79-anyos magsasaka inatado’t sinunog ng kapitbahay

SAN FRANCISCO, Quezon- Nagmistulang ginayat na karne bago sinunog ang isang magsasaka sa Sitio 1, Brgy. Pagsangahan ng bayang ito kamakalawa.

Ang biktima ay kinilalang si Rosalio Gargoles, 79, balo, magsasaka, ng nasabing lugar.

Agad inaresto ang suspek na si Rene Boy Butal Gupid, 40, residente rin ng nabanggit na lugar.

Ayon kay Sr. Supt. Ronaldo Ylagan, Quezon Police Provincial director, dakong 11:00 a.m. nang makatanggap sila ng impormasyon na may bangkay na sinunog kaya agad nirespondehan.

Inamin ng suspek na hinataw muna ng kawayan ang biktima bago tinadtad ng saksak saka sinunog.

Nakakulong sa detention cell ng San Francisco Municipal Police Station ang suspek habang inihahanda ang kasong murder na isasampa laban sa kanya.

(RAFFY SARNATE)