HATAW! D'yaryo ng Bayan hatawtabloid.com
MALAKI ang hinala ng political prisoner sa Bureau of Jail Management and Penology (BJMP) Female Dormitory sa Camp Bagong Diwa, Taguig City, na nagdadrama lamang si Atty. Gigi Reyes upang hindi tuluyan maikulong.
Sa sulat ni Loida Magpantay, isa sa mga political prisoner sa BJMP na ipinadala sa secretary general ng grupong Hustisya na si Cristina Guevarra, desmayado sila dahil hindi nila nakasama si Reyes, na nasasangkot din sa multi-bilyong pork barrel scam at nahaharap sa kasong plunder.
Gusto sana nilang tanungin mismo si Reyes, kaugnay sa usapin ng Priority Development Assistance Fund (PDAF) pero hindi na nila nagawa dahil sa paglabas mula sa kulungan.
Naniniwala ang mga preso na nag-drama lang si Reyes dahil sa biglang pag-iyak, pag-hysterical at nanigas kaya isinugod sa Taguig-Pateros District Hospital.
Kinondena rin ang special treatment kay Reyes na nakaratay na sa Philippine Heart Center matapos ilipat nitong Biyernes ng gabi mula sa Taguig Hospital.
Posible umanong natakot si Reyes nang mapaulat na makakasama niya ang mga miyembro ng New People’s Army (NPA) tulad ni Andrea Rosal sa loob ng piitan.
(JAJA GARCIA)
