Fajardo nangunguna sa MVP race

HAWAK ngayon ni Junmar Fajardo ng San Miguel Beer ang liderato para sa pagiging Most Valuable Player ng ika-39 na PBA season, ayon sa mga statistical points na inilabas ng liga noong isang araw.

Nag-average si Fajardo ng 24.4 statistical points sa pagtatapos ng PBA Commissioner’s Cup noong isang linggo.

Naunang nakamit ni Fajardo ang pagiging Best Player ng Philippine Cup noong Pebrero.

Nasa ikalawang puwesto ang 2013 PBA MVP na si Arwind Santos na may 23 SPs samantalang nasa ikatlong puwesto si Jason Castro ng Talk n Text na may 22.4 SPs.

Umakyat sa ika-apat na puwesto si Asi Taulava ng Air21 na may 20.7 SPs dahil sa kanyang mahusay na laro noong Commissioner’s Cup nang dinala niya ang Express sa semis.

Nakamit ni Taulava ang pagiging MVP ng PBA noong 2003.

Nasa ikalimang puwesto naman si Greg Slaughter ng Barangay Ginebra San Miguel na may 20.6 SPs at siya rin ang nangunguna sa Rookie of the Year kontra kay Ian Sangalang ng San Mig Super Coffee na may 13.8 SPs.

(James Ty III)