Grade 7 kritikal sa boga ng 3 frat member

KRITIKAL ang kalagayan ng isang grade 7 student nang patraydor barilin ng isa sa miyembro ng kalabang fraternity, sa Navotas City kamakalawa ng gabi.

Inoobserbahan sa  Tondo Medical Center (TMC) ang biktimang si Jeffrey Lorejas, 17-anyos ng Gov. Pascual St., Brgy. San Jose, sanhi ng bala ng sumpak na tumama sa likod.

Pinaghahanap ang mga suspek na nakilala sa mga alyas na Jexter, Jon-Jon at Sorrow Reyes, mga miyembro ng kalabang frat ng biktima na pawang taga-kabilang barangay.

Sa ulat, dakong 7:00p.m. kamakalawa nang maganap ang insidente sa Gulayan St., ng nasabing barangay.

Naghihintay ng masasakyan ang biktima kasama ang kaibigan nang lapitan ng isa sa mga suspek  na agad bumunot ng baril at pinutukan si Lorejas.

Dahil sa takot, mabilis tumakbo ang biktima pero pinaputukan  pa rin siya dahilan upang bumagsak sa lupa saka tumakas ang mga suspek habang dinala ang biktima sa nasabing pagamutan.

(rommel sales)