NAGSALITA na si Czech Ambassador to the Philippines Josef Rychtar tungkol sa sinasabing $30 milyong tangkang pangingikil ng isang opisyal ng Metro Rail Transit (MRT) sa isang Czech company para makuha ang kontrata sa pagbili ng mga bagong bagon para sa MRT III.
Sinabi ni Rychtar na sa kanyang bahay naganap ang pagpupulong nila ni MRT General Manager Al Vitangcol III para pag-usapan ang pagkuha ng Czech company na Inekon Group ng kontrata para sa supply ng mga bagong bagon.
Kasama aniya ni Vitangcol ang ilan pang tao sa pagpupulong na naganap noong Hulyo 2012. Dito aniya naganap ang paghingi ng grupo ni Vitangcol ng $30 milyon para makuha ang kontrata sa mga bagong bagon ng MRT.
Habang nasa pulong, may tinatawagan aniya sa telepono ang kasamang tao ni Vitangcol.
“In the discussion they had to consult, only this person can decide, Mr. Vitangcol is the head of the MRT…I think that he’s behind this corruption,” pahayag ng embahador.
Nang tanungin ang opisyal kung sa tingin niya ay may nagbibigay ng proteksyon kay Vitangcol na humahawak ng mataas na posisyon sa gobyerno, tugon ni Rychtar:
“If you follow all the case, if you follow all the problems arising now in the MRT, you can see that Vitangcol has a very very firm position. And nothing can move his chair, so I think that he is covered, he’s protected,” anang diplomat.
Ani Rychtar, isinumbong niya kay Department of Transportation and Communication (DOTC) Sec. Jun Abaya ang nangyari ngunit inabswelto ng ahensya si Vitangcol sa naging resulta ng imbestigasyon dahil sa kawalan ng ebidensya.