Drug personality, 1 pa tiklo sa parak

BAGSAK sa piitan ang isang lalaking kabilang sa drugs watchlist at kanyang kasama nang maaktohang bumabatak ng ilegal na droga sa isang apartment sa Pasay City, kamakalawa ng hapon.
Nakakulong sa detention cell ng Pasay City Police ang mga suspek na sina Vicente Dineros, nasa drugs watchlist, 43, may asawa, tint installer, at residente sa Champaca St., Brgy. 137, Zone 15, Pasay City, at Vicente Valencia, 53, tint installer, nakatira sa Buli St., Brgy. Cupang, Muntinlupa City.
Base sa ulat, nakatanggap ng tawag ang pulisya mula sa isang concerned citizen na may pot session sa loob ng apartment na tinutuluyan ni Dineros, dakong 5:05 ng hapon.
Naabutan ng mga pulis sa lugar ang dalawang suspek na abala sa paggamit ng ilegal na droga na agad nilang ikinaaresto.
Nakompiska mula kina Dineros at Valencia ang dalawang selyadong pakete ng hinihinalang shabu, isang bukas na pakete ng naturang droga, at drug paraphernalia. (JAJA GARCIA)