HATAW! D'yaryo ng Bayan hatawtabloid.com
KAHIT na lubhang nakaaangat sila sa kani-kanilang katunggali, nais kapwa ng BaliPure at Philippine Air Force na hindi lumaylay ang kanilang performance sa dulo ng elimination round ng Shakey’s V-League Season 13 Open Conference.
Makakatunggali ng BaliPure ang Team Baguio sa ganap na 4 pm samantalang makakasagupa ng PAF ang Team Iriga sa ganap na 6:30 pm sa The Arena sa San Juan.
Sa natatanging laro ng Spikers Turf sa ganap na 1 pm ay magkikita ang Philippine Navy at Philippine Air Force.
Kapwa may 4-1 records ang BaliPure at PAF at nasa likod ng nangungunang Pocari Sweat na may 5-0. Ang Iriga at Baguio ay pareho nang nalaglag. May 1-5 karta ang Lady Oragons samantalang ang Summer Spikers ang tanging koponang hindi pa nakakatikim ng panalo sa torneo at may 0-6.
Matapos na mabigo sa Air Force, 25-23, 14-25, 25-19, 25-16 sa kanilang unang laro ay hindi na nakalasap muli ng pagkatalo ang BaliPure ni coach Charo Soriano.
Lalong tumatag ang BaliPure sa pagdating ng superstar na si Alyssa Valdez mula sa Europe kung saan naging bahagi siya ng exhibition games.
( SABRINA PASCUA )
