HATAW! D'yaryo ng Bayan hatawtabloid.com
SWAK sa kulungan ang isang tricycle driver na nakuhaan ng shabu sa isang checkpoint habang sakay ng motorsiklo sa Valenzuela City.
Kinilala ang suspek na si Rodel Deran, 38 anyos, tricycle driver ng S. Cristobal St., Karuhatan na nahaharap sa kasong paglabag sa RA 9165.
Sa report ni Station Drug Enforcement Unit (SDEU) investigator P/Cpl. Glenn De Chavez kay Valenzuela police chief Col. Ramchrisen Haveria, Jr., dakong 2:30 pm, nagsasagawa ng checkpoint sa harap ng Sea Oil sa Karuhatan Road, Brgy. Karuhatan ang mga tauhan ng Sub-Station 9 sa pangunguna ni P/Lt. Francisco Tanagan nang parahin ni Pat. Sunny Mercado at P/Cpl. Darwin Orale si Deran na sakay ng isang motorsiklo.
Nang hingin ang kanyang driver’s license para sa berepikasyon, nakita ni Pat. Mercado ang isang transparent plastic sachet ng hinihinalang shabu kaya’t agad inaresto ang suspek at nang kapkapan ay nakakuha ng isa pang plastic sachet.
Tinatayang nasa 2.5 gramo ng hinihinalang shabu, may standard drug price na P17,000 at isang kulay asul na Rusi motorcycle, walang plaka ang nakompiska sa suspek. (ROMMEL SALES)
