HATAW! D'yaryo ng Bayan hatawtabloid.com
ARESTADO ang isang lalaki matapos ireklamo ng panggagahasa sa kanyang dalagitang pamangkin sa bayan ng Obando, lalawigan ng Bulacan, nitong Lunes, 31 Mayo.
Sa ulat mula sa Obando Municipal Police Station (MPS), kinilala ang suspek na si Ricky Mendoza, 44 anyos, residente sa Brgy. Panghulo, sa nabanggit na bayan.
Nabatid na dinakip ng mga awtoridad ang suspek matapos ireklamo ng ina ng kanyang 17-anyos na pamangkin na ginahasa ang biktima sa kanilang bahay sa naturang barangay.
Sinamantala umano ng suspek na silang dalawa lamang ang tao sa bahay at nang pagsakluban ng pagnanasa ay sapilitang inangkin ang puri ng dalagitang pamangkin.
Kahit tinakot ng suspek ang biktima na may masamang mangyayari kapag nagsumbong ng kanyang ginawa ay nanaig pa rin ang pagnanais ng dalagita na makamit ng katarungan sa kanyang sinapit kaya ipinagtapat niya ito sa kanyang ina.
Agad nagsadya sa himpilan ng Obando MPS ang ina ng biktima at isinumbong ang pangyayari na nagresulta sa pagkaaresto ng suspek. (MICKA BAUTISTA)
