HATAW! D'yaryo ng Bayan hatawtabloid.com
SA ikaapat na pagkakataon, muling ikinasal ang dating Liberty Boy (kasama ng mga orig na Rey Abellana at Lito Pimentel) na si Edgar Mande sa kanyang long-time girlfriend and live-in partner na si Ramona Fabie.
Matagal na panahon ng tinalikuran ni Edgar ang showbusiness. Na ang karera ay nagsimula noong dekada ‘’80 at ginabayan ng manager at reporter na si Alfie Lorenzo.
Sinagupa ni Mande ang mahirap na pamumuhay sa Amerika. At matapos ang ilang taon ay nakilala niya si Mona. At nagpatuloy na siya sa pangarap na magkaroon ng magandang buhay sa bansa ni Tiyong Sam.
Sa Los Angeles, California sila nakabase ni Mona at ng dalagang anak ni Edgar.
Kaya 45 minutes ang itinagal ng lipad ng kanilang nilulanang helicopter patungong Las Vegas, Nevada para sa kanilang pag-iisang-dibdib. At sinundo ng limosina patungo sa kung saan sila magpapalitan ng walang hanggang pagmamahalan.
Kung may pagkakataon na makauwi sila ng Pilipinas, hindi nakaliligtaan ni Edgar na makipag-reunion sa mga kasama niya sa industriya.
At sa Amerika naman, sige rin siya sa pakikipagkita sa mga artistang mas pinili na rin na doon na manirahan.
“It’s my 4th wedding. Sana ito na ang huli! Ibinigay ng Diyos sa akin si Mona (na isang Nurse sa isang malaking pagamutan doon). Wala ng part 5. Haha. Ang sa akin eh, maging masaya tayo sa buhay natin. Dahil life is short, sabi nga. Ang mga magkaka-away eh, magbati-bati na. Masayang-masaya, ‘yun ang pakiramdam.”
HARD TALK!
ni Pilar Mateo
