Monday , August 2 2021
Breaking News
You are here: Home / News / MECQ sa NCR Plus pinalawig (Hanggang 14 Mayo)
MECQ sa NCR Plus pinalawig (Hanggang 14 Mayo)

MECQ sa NCR Plus pinalawig (Hanggang 14 Mayo)

INAPROBAHAN ni Pangulong Rodrigo Duterte ang rekomendasyon ng mga eksperto at ng Department of Health (DOH) na palawigin hanggang 14 Mayo ang umiiral na modified enhanced community quarantine (MECQ) sa NCR Plus.
 
Inianunsiyo ito ng Pangulo kagabi sa kanyang Talk to the People.
 
Humingi ng paumanhin si Pangulong Duterte sa publiko sa desisyon niyang palawigin ang MECQ sa Metro Manila, Rizal, Bulacan, Cavite at Laguna dahil sa pagtaas ng kaso ng CoVid-19.
 
“Wala tayong magawa, ang virus ay lumilipad sa hangin kaya kailangan sumunod na muna kayo,” aniya.
 
Binigyan diin niya, ang pasya ay para sa public interest, siya umano ang pinakahuling magpapahirap sa mga Pinoy at sumunod lamang siya sa rekomendasyon ni Health Secretary Francisco Duque III na mas nakaaalam ng sitwasyon bilang doktor.
 
Sinabi ng Pangulo isinailalim rin sa MECQ ang Santiago City sa Isabela, lalawigan ng Quirino at Abra.
 
Inilinaw ni Presidential Spokesman Harry Roque sa isang kalatas na ang MECQ ay iiral sa tatlong lugar sa buong buwan ng Mayo.
 
Habang ang mga area na nasa general community quarantine mula 1-31 Mayo ay: Cordillera Administrative Region, Apayao, Baguio City, Benguet, Ifugao, Kalinga,
Mountain Province.
 
Ganoon ang mga lalawigan sa Region 2: Cagayan, Isabela, Nueva Vizcaya; Region 4A: Batangas, Quezon;
Region 8: Tacloban; Region 10: Iligan City; Region 11:
Davao City; BARMM: Lanao del Sur.
 
Ang mga lugar na hindi tinukoy ay nasa ilalim ng modified general community quarantine.
 
“This new community quarantine classification is subject to the appeals of the local government units,” sabi ni Roque. (ROSE NOVENARIO)

About Rose Novenario

Leave a Reply

Your email address will not be published. Required fields are marked *

*

Scroll To Top