Monday , May 10 2021
Breaking News
You are here: Home / News / Duterte binatikos ng mga obispo sa pag-alis ng mining ban
Duterte binatikos ng mga obispo sa pag-alis ng mining ban

Duterte binatikos ng mga obispo sa pag-alis ng mining ban

KIDAPAWAN, COTABATO — Binatikos ng ilang mga obispo ang desisyon ni Pangulong Rodrigo Duterte na alisin ang siyam-na-taong moratorium sa mga bagong mining deal para tukuying makasasama ang magiging epekto nito sa mahihirap na komunidad na muling aabusuhin ng mga kompanyang nagmimina sa kanilang lugar.

Nilagdaan ang nasabing moratorium noong 2012 ni dating Pangulong Benigno Simeon “Noynoy” Aquino III upang masuri ng mga awtoridad at ma-renegotiate ang mga kontrata sa mga nagmiminang kompanya sakaling nagkakaroon ng usapin ukol sa pagkasira ng kapaligiran at kalikasan.

Inilinaw noon ni Aquino na ang desisyon para sa moratorium ay makapagbibigay ng ‘breathing space’ sa kapaligiran at kalikasan para manumbalik ang mga pananim at hayop.

Ngunit inalis ni Pangulong Duterte noong 14 Abril sa pagnanais na mapaigting ang pagkolekta ng buwis ng pamahalaan, makalikha ng mga trabaho at mapasigla ang ekonomiyang bugbog-sarado ng pandemyang coronavirus.

Ipinawalang-bisa ng Executive Order No. 130 ni Duterte ang probisyon ng Executive Order No. 79 (Institutionalizing and Implementing Reforms in the Philippine Mining Sector, Providing Policies and Guidelines to Ensure Environmental Protection and Responsible Mining in the Utilization of Mineral Resources) na inilabas ng administrasyong Aquino noong 2012.

Ikinatuwiran ni Duterte na ang sistema ng pagbubuwis para sa pagmimina sa ilalim ng Tax Reform for Acceleration and Inclusion (TRAIN) Act ay natugunan na ang mga kondisyon sa EO 79 at sinabing dinoble ng TRAIN Act ang pagbubuwis sa mga mineral at mga produkto nito bukod sa quarry resource mula sa dalawa sa apat na porsiyento.

Gayon man, inihayag ni Kidapawan Bishop Jose Colin Bagaforo, na siyang namumuno sa Caritas Philippines at Episcopal Commission on Social Action, Justice and Peace ng Catholic Bishops Conference of the Philippines (CBCP), na ang desisyon ng dating alkalde ng  Davao City ay papabor lang sa interes ng mga nagnenegosyo at hindi ng taongbayan, partikular ang mahihirap na komunidad na naninirahan kalapit ng mga minahan.

“The government has once again chosen vested interests and profit over suffering people and the ecology,” tinukoy ni Bagaforo.

Sinabi rin ng obispo na lumilitaw, ang aksiyon ng pamahalaan ay ‘motivated’ ng sariling pagnanasa at hindi ang kapakanan ng nakakarami.

“The government must reconsider lifting the mining moratorium. We are in the countryside, and we are seeking no economic improvement in the lives of the people from mining,” kanyang idiniin.

                (Kinalap mula sa Union of Catholic Asian News ni Tracy Cabrera)

About Tracy Cabrera

Leave a Reply

Your email address will not be published. Required fields are marked *

*

Scroll To Top