HATAW! D'yaryo ng Bayan hatawtabloid.com
APAT katao ang inaresto sa magkahiwalay na anti-drug operation ng mga awtoridad sa mga lungsod ng Pasig at Marikina nitong Martes, 9 Marso.
Kinilala ang mga nadakip na suspek na sina sina Ronald Juangco, 39 anyos; Melward Arcilla, 53 anyos; Jose Santos, 55 anyos; at Jayson Florendo, 31 anyos.
Unang nadakip ng District Drug Enforcement Unit (DDEU) sina Juanco, Arcilla, at Santos, dakong 3:30 pm kamakalawa sa Dr. Sixto Antonio Ave., Brgy. Maybunga, lungsod ng Pasig.
Nasamsam ng mga operatiba mula sa mga suspek ang 16 gramo ng hinihinalang shabu na nagkakahalaga ng P108,800, at buy bust money.
Kasunod nito, nadakip si Florendo dakong 7:40 pm sa San Miguel Phase 3, Brgy. Fortune, sa lungsod ng Marikina.
Nakompiska mula sa suspek ang drogang tumitimbang ng tatlong gramo at nagkakahalaga ng P20,400, at mga shabu paraphernalia.
Nakapiit ang apat sa detention cell ng Eastern Police District (EPD) at nakatakdang sampahan ng kasong paglabag sa RA 9165 o Comprehensive Dangerous Drugs Act of 2002. (EDWIN MORENO)
