Tuesday , May 18 2021
Breaking News
You are here: Home / News / PH 2023 babalik sa normal — Duterte (Sa unang araw ng legal na bakunahan)

PH 2023 babalik sa normal — Duterte (Sa unang araw ng legal na bakunahan)

ni ROSE NOVENARIO

AABOT pa hanggang 2023 ang kalbaryo ng bansa sa epekto ng pandemya.

Inamin ito ni Pangulong Rodrigo Duterte sa kanyang talumpati sa welcome ceremony sa pagdating  ng 600,000 doses ng Sinovac-made CoVid-19 vaccine (coronavac) sa bansa kamakalawa.

“In about maybe early, mga year 20, year 23, not the 22. Ito ngayon hanggang katapusan ng buwan, paspasan tayo. Early in the first, maybe first or second quarter of year 23, 2023, baka, sa tulong ng Diyos,” anang Pangulo.

Ngunit kahit dalawang taon pa bago magbalik sa normal ang pamumuhay sa bansa ay nagbabalak na si Pangulong Duterte na alisin na ang quarantine qualification.

Kailangan aniyang buksan na ang ekonomiya para makabangon ang kabuhayan ng lahat pero dapat ay magkaroon na ang bansa ng hanggang dalawang milyong stock ng bakuna kontra CoVid-19.

“Magkaroon lang tayo ng stock ng 2 million, bitawan ko na. I will open the economy. Talagang hirap tayo,” aniya.

Sinimulan nang iturok ang CoronaVac sa ilang health care workers at opisyal ng gobyerno kahapon.

Kauna-unahang legal na nabakunahan si University of the Philippines-Philippine General Hospital (UP-PGH) Director Dr. Gerardo Legaspi sa ginanap na symbolic vaccination ceremony sa UP-PGH grounds na dinaluhan ng matataas na opisyal ng pamahalaan.

Si Nurse Chareluck Santos ang nagturok ng bakuna kay Legaspi.

“Si Dr. Legaspi ang nanguna sa atin sa laban na ito kaya karapat-dapat lang na siya ang unang tumanggap ng ating bakuna,” ayon kay PGH spokesperson Dr. Jonas Del Rosario.

“Kayong dalawa ay nasa kasaysayan na ng COVID-19,” aniya kina Legaspi at Santos.

Nabakunahan din  si Food and Drug Administration (FDA) chief Eric Domingo habang si testing czar Secretary Vince Dizon ay sa Dr. Jose N. Rodriguez Memorial Hospital and Sanitarium) sa Caloocan City nagpaturok ng coronavac.

Bukod sa PGH, kabilang rin sa priority hospitals ang Lung Center of the Philippines, Veterans Memorial Medical Center, Dr. Jose N. Rodriguez Memorial Hospital and Sanitarium (Tala Hospital), PNP General Hospital, Pasig City General Hospital, at V. Luna Medical Center.

Batay sa survey sa Tala Hospital, 180 lamang sa 1,165 ang interesadong magpaturok ng cronavac kaya’t nagkakasa ng isang contingency plan ang pagamutan upang maiwasang maaksaya ang bakuna.

Matatandaang iniha­yag ng FDA na hindi rekomendado sa healthcare workers at senior citizens ang coronavac kahit binigyan ng ahensiya ng emergency use authorization (EUA).

About Rose Novenario

Leave a Reply

Your email address will not be published. Required fields are marked *

*

Scroll To Top