Sunday , May 16 2021
Breaking News
You are here: Home / Sports / Pacquiao sinabihan ng Diyos tumigil na sa boxing
Pacquiao sinabihan ng Diyos tumigil na sa boxing

Pacquiao sinabihan ng Diyos tumigil na sa boxing

MANILA—Maaaring nabigo ang ina ni Manny Pacquiao na kombishin ang kanyang anak na magretiro na sa boxing, ngunit sa masasabing divine intervention, inihayag ng eight division world champion na ang Diyos mismo ang nagsabi sa kanya sa isang panaginip nitong nakaraang Enero ng taong kasalukuyan na baguhin ang kanyang pamumuhay at ikonsidera ang maagang pagtigil sa boxing.

Sinabi ni Pacquiao, na itinuturing ng kanyang fans bilang pinakamahusay na pound-for-pound fighter sa daigdig, nagpakita sa kanya ang Diyos sa isang pangitain at hiniling na magretiro na siya.

“I will not stay long in boxing because He said: ‘You have done enough. You have made yourself famous but this is harmful,’” paggunita ni Pacquiao mula sa kanyang panaginip.

Noong 2009 pa lang ay hinihiling na ng ina ng senador na si Aling Dionesia na itigil na ang pagba-boxing para makaiwas sa karagdagan pang injury dahil wala na naman siyang kailangan pang patunayan bilang boksingero at opisyal ng bansa.

At sinasabing ang paboritong anak, na nagwagi ng walong titulo sa walong division ng boxing at hinirang na Fighter of the Decade, ay tutugunin ang kahilingan ng ina — ngunit nakalinya pa rin ang ilan pang mga laban ng beteranong boxing promoter na si Bob Arum, na nakilala sa malalaking labanan tulad ng Marvin Hagler-Roberto Duran title fight noong 1983 at tanging si Don King lamang ang karibal.

Sa 9 Hunyo ngayong taon, muling titindig sa boxing ring ang Pambansang Kamao para itakda ang kanyang korona sa welterweight ng World Boxing Organization (WBO) kontra sa Amerikanong  light welterweight challenger na si Timothy Bradley sa MGM Grand Garden Arena sa Las Vegas.

At sa puntong ito, isang bagong Pacquiao ang lilitaw—na iwinaksi ang mga bisyo at nangangaral mula sa Biblia. Nang tanungin kung ang kanyang mataimtim ngayong pananampalataya sa Diyos ay makaaapekto sa kanyang husay sa boxing, tumugon si Pacman: “I will do my work inside the ring.”

Nangangahulugang buong puso niyang sasagupain ang walang talong si Bradley, na walang duda ay nasa rurok ng kanyang galing sa edad na 28 at may panalong 28, at isang draw.

Ayon sa 33-anyos na si Pacquiao, ay hawak ng 54-3-2 record, naniniwala siyang pinili siya ng Diyos para gamitin ang kanyang katanyagan sa pagpapalaganap ng Banal na Aral sa mga Kristiyano.

“When I speak, a lot of people listen,” ani Pacquiao.

Kinalap ni Tracy Cabrera

About Tracy Cabrera

Leave a Reply

Your email address will not be published. Required fields are marked *

*

Scroll To Top