HATAW! D'yaryo ng Bayan hatawtabloid.com
TINUTUTULAN ng grupo ng mga driver ang isinasagawang phaseout ng mga jeepney sa bansa sa panahon na ‘naglilimahid’ sa gutom dulot ng pagbabawal sa pagbiyahe sa gitna ng pandemya ng Covid 19.
Ayon kay Nolan Grulla, tagapagsalita ng grupo ng mga driver sa Unibersidad ng Pilipinas, gutom ang idudulot ng isinusulong na modernisasyon ng pamahalaan.
“Paano naman kami makababayad ng P2.6 milyones para sa isang modernong jeep?” tanong ni Grulla na 26 taon nang bumibiyayahe sa rutang UP – Philcoa.
“Bakit naman kami aalisin, e nagbabayad naman kami ng rehistro at prankisa,” daing ni Grulla.
Paliwanag niya, hindi sila umangal sa pagpasok ng UV express at iba pang paraan ng transportasyon.
Aniya, pwede naman magdagdag ng bagong jeep na itinuring niyang mini-bus.
“Pero huwag naman sana kaming alisin,” aniya.
Naunang binatikos ng Arangkada UP ang Public Utility Vehicle Modernization Program o ang Jeepney Phaseout Program na inumpisahan noong 2017 ni Pangulong President Rodrigo Duterte at transport secretary Arthur Tugade sa halagang P 2.2 bilyon.
Sa isang liham ni Kilusang Mayo Uno, Executive Vice Chairman Lito Ustarez, malaki ang kaibhan ng presyo ng kasalukuyang jeepney at ng bagong jeepney.
Sa press conference sa UP noong Biyernes, sinisi ni Ustarez ang pamahalaan sa kawalan ng kita ng mga jeepney driver.
Ani Ustarez, nagpabaya ang gobyerno sa mga nararapat gawin sa CoVid-19.
Dahil sa kapabayaan, maraming driver ang namamalimos ngayon sa kalsada upang mabuhay.
“The drivers’ sector, together with the youth sector, stands firm against the Duterte regime’s fascism and dictatorship. The two said sectors are in their struggle to fight for their right to livelihood and to hold the administration accountable for its crimes to the Filipino people,” ani Ustarez.
(GERRY BALDO)
