Dapat sports lang walang politikahan

HINDI magkamayaw noon ang mga Filipino dahil sa tagumpay ng pagdaraos ng SEA games sa ating bansa at pagiging kampeon ng ating mga atleta sa naturang sports kompetisyon matapos ang 14 taon.

Sa pagdaraos ng SEA games, naipagawa ang Rizal Memorial Coliseum na ilang dekada nang napabayaan.

Hinangaan din ng marami maging ng mga delegado mula sa ibang bansa mula Southeast Asia ang pagtatatag ng Clark City Athletics Stadium & Aquatics Center, at ang Athletes Village dahil sa world-class nitong kalidad.

Nitong Hunyo 2020, naisabatas ang panukalang magtatayo ng National Academy of Sports, isang specialized high school para sa mga naglalayong maging mahusay na atleta sa susunod na mga taon. Siguradong magagamit ng mga estudyante ang mga pasilidad sa New Clark City.

Makikita nating may plano talaga ang administrasyong Duterte para paunlarin ang larangan ng sports at para sa mga atleta.

Pero sa kabila ng lahat ng magagandang nangyari noong nakaraang taon sa larangan ng sports, hindi pa rin matigil ang ibang mga grupo sa paghahanap ng maipupukol na pintas sa mga taong nagtatrabaho para matulungan ang Pangulo sa kanyang mga gustong ipatupad para sa atleta at kabataang Filipino.

Para sa ordinaryong kabataan, ang magagandang balitang tulad nito ay nagbibigay ng pag-asa para sa kanilang kinabukasan. Ang dating mga pipitsuging basketball court at iba pang sports facilities ay nagbagong anyo.

Sabi nga ng iba: “Puwede naman palang magdaos ng mga world-class events at magpatayo ng pasilidad na maaaring ipagmalaki at magamit ng mas maraming atleta.”

E kung kaya pala, bakit hindi ginawa ng mga nakaraang administrasyon?