3 bebot nasakote sa P36-M shabu

DINAKIP ng Quezon City Police District (QCPD) ang tatlong babaeng high-value individual (HVI) makaraang makompiskahan ng P36 milyong halaga ng shabu sa anti-illegal drug operation nitong Lunes ng gabi sa  Bacoor City, Cavite.

Sa ulat ni P/BGen. Ronnie Montejo, kinilala ang mga suspek na sina Anabel Natividad, a.k.a Anabel Mayol, 52, Teresita Daan, 52, at Riza Aguiton, 43, pawang residente sa Barangay Molino III, Bacoor City, Cavite.

Ayon kay Montejo, dakong 10:45 pm, ikinasa ng Station Drug Enforcement Unit (SDEU) ng QCPD Cubao Police Station 7 sa ilalim ni Station Commander P/Maj. Regino Maramag, Jr., at ng kanyang Deputy na si P/Maj. Alejandro Batobalonos kasama ang RID-NCRPO, RSOU PRO-4A at Bacoor City Police Station, ang buy bust laban sa tatlo sa Block 4, Lot 8, Carson Camilla, Barangay Molino III, Bacoor City.

Matapos iabot ang ilegal na droga na nagkakahalaga ng P245,000 sa pulis na nagpanggap na buyer, dinakip na ang tatlo.

Samantala, nagawang makatakas ng isang suspek na si Raffy Aguiton.

Nakuha rin sa mga suspek ang limang kilo ng shabu na nagkakahalaga ng P36,040,000 at Ford Raptor, may plakang NFW 3283.

Nahaharap ang tatlo sa kasong paglabag sa R.A. 9165 (Comprehensive Dangerous Drugs Act of 2002). (ALMAR DANGUILAN)