Friday , December 4 2020
Breaking News
You are here: Home / Hataw Lifestyle / Dinosaur naghahatid ng libreng pagkain sa mga kabataan

Dinosaur naghahatid ng libreng pagkain sa mga kabataan

MARAMING pagbabago ang idinulot ng pandemyang coronavirus sa ating lipunan, kabilang ang pagsusuot ng face mask at face shield, pagdistansiya sa kapwa at pagkuwarantina sa mga indibiduwal na nagpapakita ng sintomas ng sakit na CoVid-19.

Lahat ng mga pagbabago o sistemang ito ay may layuning pigilan ang pagkalat ng pandemya, na kumitil sa milyong buhay ng mga inosenteng tao at impeksiyon sa milyon-milyon pang iba.

Ang pandemya ay naging sanhi rin ng restriksiyon sa kalayaan nating makalabas ng ating mga tahanan, makapunta sa ating mga kaibigan at gayondin sa ating trabaho na ang karamihan kun hindi man nagsara ay pansamantalang natigil ang operasyon.

Kaya nga karamihan sa atin ay nagsasagawa ngayon ng mga bagay na angkop sa pagbibigay ng proteksiyon sa ating mga sarili kontra sa bagong coronavirus o ang CoVid-19.

Bunsod nga nito ay nagsagawa ang popular na palatuntunang para sa kabataan na Sesame Street sa Middle East na magpatupad ng kanilang pamamaraan para makasunod sa minimum health protocols, partikular sa ‘social distancing.’

Ipinapairal ngayon sa produksiyon ng popular na palatuntunang kabataan ang mahigpit na alituntunin kaya ang mga gumaganap na mga muppet dito ay isinasagawa ang kanilang pag-arte sa kani-kanilang tahanan para makaiwas sa magkalapit ang isa’t isa para makatulong sa paskontrol sa paglaganap ng CoVid-19.

Sa Inglatera, nakaisip din ang mga volunteer na sina Joe Parsonage at Sam Bryan ng kakaibang pagde-deliver ng libreng pagkain sa mga kabataan habang nasa kanilang mga tahanan ang mag-aaral na kalahok sa bagong usong online at distance learning module.

Nakunan ng video ang kakaibang pamamaraan nina Parsonage at Bryan: Isang malaking dinosaur ang nakunang gumagala sa mga lansangan ng Machester at Wirral para maghatid ng ‘free school meals’ sa mga batang mag-aaral sa gitna ng pandemya sa nasabing bansa.

Gamit ng magkaibigang volunteer ang dinosaur na si Jam the T-Rex para sa mga workshop ngunit ngayo’y nakatutulong ito para mabigyan ng kasiyahan ang mga kabataan para malabanan ang kalungkutan at ang agam-agam dulot ng coronavirus.

Ang nakatutuwa pa rito ay napapaalalahanan ang mga bata ukol sa social distancing dahil tinitiyak ni Jam na malayo siya sa kanila kapag naghahatid ng mga libreng pagkain sa bahay-bahay.

Tracy Cabrera

About Hataw Tabloid

Leave a Reply

Your email address will not be published. Required fields are marked *

*

Scroll To Top