Saturday , October 31 2020
Breaking News
You are here: Home / Opinion / Velasco ‘olats’ sa solons bilang speaker
Velasco ‘olats’ sa solons bilang speaker

Velasco ‘olats’ sa solons bilang speaker

KUNG kalipikasyon ang pag-uusapan, sa kangkungan maipupulutan ‘este pupulutin si Lord Velasco sa isyu ng speakership sa Kamara.

        Sabi nga, sobrang nipis ang angking kaalaman at kapasidad kompara kay Speaker Alan Cayetano.

Tingnan n’yo na lang si Cayetano, napakalawak ng kanyang karanasan dahil nagsimula ng paninilbihan sa local government unit (LGU), naging kongresista, senador, naging Cabinet secretary, at ngayon Speaker of the House.

Kayang-kayang makipagbalitaktakan tungkol sa napakaraming usapin pati na ang mga bagay na ibinabato sa Duterte administration.

        Ang tanong, mula noong maging Pangulo si Digong, naipagtanggol na ba ni Velasco ang administrasyon sa mga kritiko at bashers nito? May sinabi na ba siya bilang depensa kay Digong at sa mga tira ng oposisyon laban sa gobyerno?

Sa dinamirami ng mga puna ng kalaban sa Duterte administration, nakabibingi ang katahimikan ni Velasco para man lang tumindig para sa administrasyong kanyang kinabibilangan. Kaalyado ba talaga siya ni Digong? Nagtatanong lang naman po.

        At hindi ba ninyo nahahalata, kulang na kulang ang performance ni Velasco sa Kamara. Minsan, hindi pa dumadalo sa pagdinig mismo ng kanyang pinamumunuang Committee on Energy.

Dapat man lang, kung talagang gusto niyang maging Speaker, naging aktibo siya sa Kamara noon pa man. Ang sabi nga ng maraming kongresista, tahimik si Velasco at hindi masyadong gumagalaw sa Kamara.

Kumbaga, bigo si Velasco na makuha ang suporta ng mga kapwa solon sa nagdaang 15 buwan. Kaya naman hindi tama na basta na lang siya susulpot sa kamara bilang speaker. Hindi naman niya ito birthright.

        Oo nga’t nagkaroon ng kasunduan para sa 15-21 term-sharing sa Kamara, pero sa totoo lang, nagawa ng kasulukuyang liderato ng Kongreso sa ilalim ng pamumuno ni Cayetano ang priority measures ng administrasyon ni Digong.

Kaya nga dahil dito, nakakuha ng pinakamataas na rating ang Kongreso at si Cayetano sa poll surveys ng SWS at Pulse Asia na kauna-unahan sa kasaysayan ng Kamara.

Asahan na natin na makakanti ang kampo ni Velasco dahil kung tutuusin kulang siya sa numero ng mga kongresista na sumusuporta sa kanya. Hindi maitatanggi, na hawak ni Cayetano ang majority kasama na ang Nacionalista Party, National Unity Party, ang partido ni Majority Leader Martin Romualdez, at iba pang miyembro ng coalition kasama na ang ibang miyembro ng party-list group.

Siguradong nagkukumahog na ngayon si Velasco lalo sa pahayag ni Digong na ipauubaya niya sa mga kongresista ang speakership issue kasabay ng pag-amin ng Pangulo na wala siyang magagawa kung hindi makakuha si Velasco ng numero sa Kamara.

Kumbaga, hands-off na ang Palasyo sa bagay na ito.

E bakit pa nga ba magpapalitan ng liderato kung nagawa naman ang dapat na trabaho ng Kongreso lalo na ang listahan ng priority measures ng Palasyo?

        ‘Ika nga, “Why fix anything that is not broken?”

PAPI MAY MALASAKIT
SA CONSUMERS
VS ABUSO NG PECO

BILANG suporta sa consumers, isang investigative report na nagpapakita ng tunay na sitwasyon ng power system sa Iloilo City ang inilabas ng Publishers’ Association of the Philippines (PAPI), ang pinakamalaking media group sa bansa na kinabibilangan ng mga publisher.

Hinimay sa nasabing report ang pang-aabuso ng power supplier na Panay Electric Company (PECO) gayondin ang mga pagbabago sa lungsod matapos ang pagbagsak ng mahigit 96-taon operasyon nito.

Sinabi ni PAPI President Nelson Santos, bilang tagapagtaguyod sa pamamahagi ng katotohanan na 45-taon nang ginagawa ng PAPI, responsibildad nitong isiwalat ang tunay na pangyayari sa Iloilo City Electric Power, kaya naman inilabas nila ang investigative report na nagdedetalye simula ng pamamayagpag ng PECO, naging pagpapabaya, at tuluyan nitong pagbagsak makalipas ang ilang dekada.

“We took interest on the issue because it involves the interest and welfare of Ilonggo power consumers, which is really the most affected sector in this controversy. We looked at the issue and knew right away that we need to do something to ferret out the truth regarding this matter,” paliwanag ni Santos.

Aminado si Santos, sa rami ng propaganda na inilabas ng PECO mula nang matanggalan ng prankisa ay nagdulot na ito ng kalitohan sa publiko kaya naman minabuti nilang talakayin ang isyu at isinulat ang pangyayari alinsunod sa tunay at totoong nangyari.

“We, as publishers whose main product is truth, we can’t just sit idly amidst the controversy. We have to know the truth, we have to deliver the truth,” paliwanag ni Santos.

Umaasa si Santos, sa pamamagitan ng kanilang isinulat na komprehensibong report sa power situation sa Iloilo City ay makatutulong ito sa 65,000 power consumers ng lungsod para makuha ang tamang impormasyon at mabigyang linaw ang mga isyu sa harap ng mga lumalabas na propaganda.

Kabilang sa tinalakay sa investigative report ng PAPI ang kontrobersiyal na isyu ng PECO sa overbilling, regular na nararanasang power interruption, kabiguang mag-upgrade ng kanilang pasilidad gayong hindi naman nalulugi ang kompanya at may mga milyong bonuses na ibinibigay sa mga opisyal nito at hindi pagbabayad ng tax.

Hinimay din ng PAPI sa investigative report ang naging basehan sa pagkansela ng Kongreso sa legislative franchise ng PECO at ang pagsasampa nito ng iba’t ibang kaso sa korte at Energy Regulatory Commission (ERC) para mapigilan ang pag-o-operate ng bagong distribution utility na More Electric and Power Corp (More Power).

Kasama rin sa naturang report ang naging takbo ng operasyon ng More Power mula nang mag-takeover bilang power supplier ng Iloilo City noong Pebrero 2020 at ang mga nagawa sa loob ng maikling panahon.

Ayon kay Santos, sa resulta ng kanilang ginawang investigative report ay pabor sila sa naging desisyon ng Kongreso na bawian ng legislative franchise ang PECO dahil sa violations at mababang kalidad ng serbisyo na ibinibigay bilang utility operator.

Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected] Para sa mga nakaraang isyu ng BULABUGIN please visit https://www.hatawtabloid.com
BULABUGIN
ni Jerry Yap

About Jerry Yap

Columnist at HATAW D'yaryo ng Bayan / CHRONICLE (Customs); National Press Club of the Philippines President (2010-2012), Treasurer (2012), Director (2004-2010) and National Chairman at ALAM (Alab ng Mamamahayag)

Leave a Reply

Your email address will not be published. Required fields are marked *

*

Scroll To Top