Kritiko dapat pakinggan ng mga pamahalaan – WHO (Sa panahon ng pandemya)

GENEVA, Switzerland – Hinimok ng World Health Organization (WHO) ang mga pamahalaan sa iba’t ibang bansa na makipag-usap at pakinggan ang mga kritiko ng mga ipinatutupad na paghihigpit dulot ng pandemyang CoVid-19.

 

Ayon kay WHO director general Dr. Tedros Adhanom Ghebreyesus, mahalagang pakinggan ang saloobin ng publiko sa ganitong panahon na namamayagpag ang takot at pangamba dahil sa sakit.

 

“We should engage in an honest dialogue. The virus is real. It is dangerous. It moves fast and it kills. We have to do everything to protect ourselves and to protect others.”

 

Sinabi ni Michael Ryan, ang chief ng WHO emergencies na malaking hamon talaga ang pagtanggap sa mga patakarang ipinatutupad sa gitna ng kasalukuyang sitwasyon.

 

“It is really important that governments don’t overreact to people protesting against measure. The real important thing to do is to enter into a dialogue with groups.”

 

Ang pahayag ng WHO officials ay bunsod ng pagharang ng mga pulis sa Germany sa ginawang kilos protesta ng libo-libong residente na kontra sa ilang panuntunan na ipinatutupad ng pamahalaan.

 

Sa kabila nito, hinimok din ni Dr. Ghebreyesus ang publiko na intindihin ang sitwasyon dahil delikado ang kumakalat na coronavirus.

 

Ipinaalala ng WHO chief na suportado nila ang hakbang ng ilang bansa na nagbubukas na muli ng kanilang ekonomiya, pero dapat umanong masiguro na may kaakibat itong paniniguro sa kaligtasan.

 

Pinaiiwas din ng opisyal ang mga bansa sa pagluluwag ng panuntunan sa mass gatherings.

 

“If countries are serious about opening up, they must be serious about suppressing transmission and saving lives. Opening up without having control is a recipe for disaster.”

 

“Avoid these amplifying events so that the other economic sectors can actually open up and the economy can go back into life,” ani Dr. Ghebreyesus. (AFP)