Thursday , September 24 2020
Breaking News
You are here: Home / News / Resto bar owner, binaril sa ulo ng magdyowa  
Resto bar owner, binaril sa ulo ng magdyowa   

Resto bar owner, binaril sa ulo ng magdyowa  

DALAWANG bala ng baril sa ulo ang tumapos sa buhay ng isang resto bar owner makaraang barilin ng isang lalaki at babae na hinihinalang magkasintahan at nagpanggap na magpapa-reserve sa restaurant sa Quezon City, nitong Linggo ng gabi.

 

Ang biktima ay kinilalang si Mark Bien Urieta, 36, may asawa, negosyante at residente sa Emerson Bldg., E. Rodriguez Ave., Barangay Doña Josefa, ng nasabing lungsod.

 

Namatay noon din ang biktima dahil sa dalawang tama ng bala ng hindi pa batid na kalibre ng baril sa ulo.

 

Base sa report  ng Criminal Investigation and Detection Unit ng Quezon City Police District (CIDU-QCPD), ang insidente ay naganap dakong 6:30 pm, nitong 19 Hulyo, sa loob ng Crabaholic Grill and Restaurant na matatagpuan sa Emerson Bldg., E. Rodriguez, Barangay Doña Josefa.

 

Ayon sa pahayag ng empleyado ng biktima na si Cassandra Fuentes kay P/Cpl. Tanog Morshid, imbestigador ng CIDU-QCPD, abala sila sa paglilinis sa loob ng restaurant nang pumasok ang isang lalaki at babae at nagtanong ng ‘reservation.’

 

Pero nang harapin sila ng negosyante upang kausapin, bumunot ng baril ang lalaki at pinaputukan nang dalawang beses sa ulo ang biktima.

 

Nang duguang bumulagta ang biktima ay mabilis na tumakas ang mga suspek, habang agad humingi ng saklolo ang isa pang empleyado ng restaurant sa malapit na himpilan ng pulisya.

 

Nasamsam sa crime scene ng SOCO team sa pamumuno ni P/Lt. John O. Agtarap ang apat na basyo ng bala, dalawang lead core, at dalawang deformed metal jacket fragment.

 

Inaalam ng mga awtoridad ang motibo sa naganap na pamamaril upang makilala ang mga suspek. (ALMAR DANGUILAN)

About Almar Danguilan

Leave a Reply

Your email address will not be published. Required fields are marked *

*

Scroll To Top