Saturday , October 31 2020
Breaking News
You are here: Home / News / Mega web of corruption: Ikinakasang DepEd online education hi-tech pero ‘pabigat’ at komersiyalisado
Mega web of corruption: Ikinakasang DepEd online education hi-tech pero ‘pabigat’ at komersiyalisado

Mega web of corruption: Ikinakasang DepEd online education hi-tech pero ‘pabigat’ at komersiyalisado

ni ROSE NOVENARIO

NAG-VIRAL sa social media noong nakaraang buwan ang mga larawan ng mga guro sa Davao de Oro na nagkumpulan sa tabi ng kalsada para makakuha ng malakas na data connection signal bilang paghahanda sa mekanisno ng distance learning batay sa ipinaiiral na health protocols sa panahon ng pandemyang COVID-19.

Bukod sa mga guro, napaulat din na ilang mga mag-aaral ang nagpupunta sa kabundukan para makasagap ng data connection signal upang maipadala ang requirements sa kanilang paaralan.

Ang mga nabanggit na sitwasyon ng mga guro at mag-aaral ay hindi lamang sa Davao de Oro mararanasan kundi maging sa ibang bahagi ng bansa sa napipintong pagbubukas ng eskuwela sa 24 Agosto 2020, sa ilalim ng mga bagong patakaran na ipinaiiral sa sitwasyong ‘new normal.’

Ngunit ayon sa ilang eksperto sa akademya, ang bagong set-up na online education para sa mga mag-aaral at guro sa ilalim ng ‘new normal’ ay hindi paborable sa mga pamilyang maliliit ang kita lalo na yaong mga umaasa sa araw-araw na transaksiyon.

Anila, ang nakitang sitwasyon sa Davao de Oro ay hindi lamang magdudulot ng panganib sa buhay ng mga guro at mag-aaral, dagdag pasakit din ito sa bulsa ng mga magulang dahil kailangan bumili ng gadget na gagamitin ng kanilang anak sa online education, bukod pa, ‘masakit’ sa bulsa na tustusan ang load upang magamit ito.

Ibig sabihin, sa likod ng paghihirap ng mga magulang, guro at mag-aaral, tatabo nang malaki ang telecommunications companies na kokonek sa nasabing programa ng DepEd.

Kung matagal gagamitin ang data connection para sa pag-aaral, kakain ng malaking halaga sa budget ng pamilya ang pambili ng load ng estudyante.

Batay sa dokumento, inilalako ng Presidential Communications Operations Office (PCOO) at Intercontinental Broadcasting Corporation (IBC-13) sa Kongreso na maglaan ng hanggang P1.5 bilyon para sa modernisasyon ng state-run network upang maisakatuparan ang DepEd project na may titulong “Intercontinental Broadcasting K-12” mula Hulyo 2020 hanggang Abril 2021.

Nakasaad sa Marketing Plan ng proyekto ang mga sumusunod: 1. Have a YouTube channel that can be viewed by K-12 students and can be a source of revenue; 2. Partnership with private companies thru their CSR (corporate social responsibility) programs; 3. Airing of commercials in-between subject breaks.

Ibig sabihin umano, malaki ang load na magagastos ng isang estudyante para mapanood ang isang online lecture sa lugar na mahina ang signal ng telco, Smart man o Globe.

Ayon sa mga akademista, dagdag parusa sa bulsa at aksaya sa oras na sapilitang panoorin ang commercial o anunsiyo na isisingit ng IBC-13 YouTube channel.

“Kailangan ba talagang pagkakitaan ng isang state-run network ang DepEd project na magbabayad ng airtime sa IBC-13 ng hanggang P214 milyones upang ipalabas ang kanilang learning materials?” tanong ng mga akademista.

Pinangangambahan din na ang pagpasok ng mga commercial advertisement ay maging karagdagang ‘languyan ng korupsiyon’ sa ipatutupad na program.

Ilan dito ang mga tanong na: “May kukubra ba ng komisyon sa advertisement? Ilang porsiyento? May advertising agency ba na nais makinabang sa proyekto?”

Bukod diyan, may kausap ba ang telecommunication companies, gaya ng Globe at Smart, sa PCOO, IBC-13 at DepEd? (MAY KASUNOD)

About Rose Novenario

Leave a Reply

Your email address will not be published. Required fields are marked *

*

Scroll To Top