Sunday , September 27 2020
Breaking News
You are here: Home / News / Miserableng lagay ng OFWs, ‘itinatwa’ ng Palasyo
Miserableng lagay ng OFWs, ‘itinatwa’ ng Palasyo

Miserableng lagay ng OFWs, ‘itinatwa’ ng Palasyo

ITINATWA ng Palasyo ang nag-trending na video ng may 200 stranded na overseas Filipino workers (OFWs)  sa social media, na ilang araw nang pagod, puyat at gutom habang nananatili sa ilalim ng Skyway malapit sa NAIA sa pag-asang makasakay ng eroplano pabalik sa lalawigan.

 

“lilinawin ko lang: VIP treatment talaga ang mga OFW. Wala pong natulog sa ilalim ng tulay na OFW, lahat po ng ating OFW naka-hotel. Binabayaran po ng gobyerno, kaya nga po VIP iyan at libre rin ang pauwi sa kanila. Iyong mga nasa ilalim ng tulay po, tama po ang sinabi ninyo, ito po iyong mga stranded na ating mga kababayan,” walang pasubaling inihayag ni Presidential Spokesman Harry Roque sa virtual press briefing kahapon hinggil sa viral video na lumabas sa website ng Radyo Inquirer.

 

Sa naturang video ay matutunghayan ang salaysay ng isa sa OFWs na si Razel Daquitan na tatlong araw nang  nananatili sa ilalim ng Skyway sa NAIA.

 

Aniya, galing siya sa Macau at inabot ng lockdown kaya hindi nakauwi sa Davao kaya’t nag-aabang ng sweeper flight para maihatid siya sa lalawigan tangan ang lahat ng requirements gaya ng health at travel clearance.

 

Umiiyak na isinalaysay niya, imbes tulungan sila ng Overseas Workers Welfare Administration (OWWA) ay itinuro na magpunta sila sa Villamor Airbase.

 

“Monday ng gabi, pinaghiwlay kami akala namin makauuwi kami, may ibang dumating na sinabihan kami bawal tumambay hindi sila naawa kahit sa buntis, wala kaming magawa para kaming mga baboy, basura,” aniya.

 

Wala rin aniya silang maayos na pagkain at tulugan.

 

Ayon kay Roque, may bagong polisiya ang National Task Force na pinamumunuan ni Carlito Galvez at Department of Transportation (DOTr) para matulungan ang mga stranded dahil “Filipino pa rin sila.”

 

“At habang wala naman talagang provincial buses e, napakahirap makauwi galing Metro Manila papuntang probinsiya. Gaya ng aking sinabi kanina, magsisimula po tayo roon sa pagte-test sa kanila using iyong rapid test kits diyan sa Villamor Golf Course at isasakay po sila pauwi ng DOTr at ng NTF,” dagdag ni Roque.

 

Sa ulat ng Bangko Sentral ng Pilipinas (BSP), umabot sa US$33-B ang naiambag sa kaban ng banya mula sa OFW remittances noong 2019. (ROSE NOVENARIO)

About Rose Novenario

Leave a Reply

Your email address will not be published. Required fields are marked *

*

Scroll To Top