Tuesday , March 31 2020
Breaking News
You are here: Home / Opinion / Salamat kamara — Taal victims
Salamat kamara  — Taal victims

Salamat kamara — Taal victims

TODO-TODO ang pasasalamat ng mga biktima ng pag-aalboroto ng bulkang Taal sa gobyernong Duterte maging sa mga miyembro ng Mababang Kapulungan ng Kongreso dahil hindi pagpapabaya sa kanila sa gitna ng nangyaring nakagigimbal na aktibidad ng bulkan.

Aba’y kambal na resolusyon ba naman ang pinagtibay ng kamara sa ginawang sesyon sa Batangas City na tutulong sa mga biktima ng Taal.

Ito ang HR 662 na sumusuporta sa P30-bilyong hiling ni Digong na supplemental budget para sa mga biktima ng Taal at ang HR 655 na humihiling na ipalabas sa lalong madaling panahon ang pondo para sa mga relief efforts at programa para sa mga biktima ng trahedya at kalamidad.

Ayon sa isang bakwit na nasa pinakamalaking evacuation center sa lungsod ng Batangas na si Aling Epifania Deogracias, napakaganda ng ginawang pagkakaroon ng sesyon ng kamara sa Batangas Convention Center, “Napakaganda ng ginagawa nila. Kami ay nagpapasalamat na dinadamayan nila kami. Hanga ako sa kanila sa kanilang malasakit sa mga taong kagaya ko.”

Sinabi ni ginang Delilah de Castro, pangarap niyang makauwi na sa kanilang tahanan dahil iba pa rin umano ang pakiramdam sa kanilang bahay kahit maayos ang kanilang kalagayan at pagkain sa kanilang evacuation center.

Ipinarating din niya ang kanyang pasasalamat sa ginawa ng kamara na pagpunta sa Batangas para mag sesyon at pakinggan ang mga pangangailangan ng mga biktima ng kalamidad.

Maging si congressman Raniel Abu ng Batangas ay  nagpasalamat kay Speaker Alan Peter Cayetano dahil sa determinasyon na matulungan ang mga  biktima ng pag-alboroto ng bulkang Taal.

Paano ba naman, binitbit pa ni Cayetano ang mga kapwa kongresista para sa Batangas gawin ang sesyon ng kamara upang mapakinggan ang hinaing at mga pinagdaraanan ng mga biktima ng kalamidad.

Ayon kay Abu, hindi basta-basta igugupo ng kalamidad ang mga Batangueño at iba pang biktima ng Taal ngunit nakatataba ng puso na marami ang nagmamakasakit sa mga biktima ng bulkang Taal.

Ito kasi ang kauna-unahang sesyon na ginawa ng kamara mula 1987 sa labas ng apat na sulok ng Batasan Complex.

Minabuti ng kamara na ilapit lalo sa tao, lalo sa mga biktima ng kalamidad ang mga kinatawan ng kongreso upang pakinggan ang mga pangangailangan ng mga biktima lalo sa aspektong rehabilitation plan.

Ayon sa lider ng kamara na si Speaker Alan Peter Cayetano, hindi lang dapat relief efforts ang tinututukan kundi ang long term solutions para sa mga nabibiktima ng trahedya at kalamidad sa bansa lalo pa ngayon at sunod-sunod na tinatamaan tayo ng kalamidad gaya ng bagyo at lindol.

Kaya, tapikin natin sa balikat ang ating nga mambabatas dahil sa kanilang mga ginagawa na akala ng marami sa atin ay imposibleng gawin lalo sa kanilang mga hakbang gaya ng P.5-M na donasyon ng Rules Committee sa Taal victims, patuloy na relief operations ng Bahay, BHW Party-lists, si Congw. Len Alonte na nagbigay ng relief packs, Cong. Mike Defensor na nagbigay ng N95 masks, at si Speaker Cayetano at misis na si Congw. Lani na nagbigay ng family food  packs, inuming tubig, libreng medical consultations,  gamot at N95 masks.

Ilan lamang ito sa mga tulong na naipamigay ng mga kongresista sa mga biktima ng Taal.

 

LRT 1 PASSENGERS
NASA MABUBUTING
KAMAY NA
BUHAY HAYAHAY PA
SA LOOB NG TREN

Tipikal sa ating mga Pinoy ang pagiging madiskarte. Kung araw-araw kang nagko-commute para pumasok sa eskuwela o makarating sa iyong trabaho, pipiliin mo siyempre na sumakay at makipagsiksikan sa tren partikular sa Light Rail Transit (LRT) 1.

Kahit kadalasan ay siksikan, bawas stress naman ito sa grabeng kunsumisyong dala ng matinding bigat ng trapiko. Ubos na nga ang oras mo sa pagtunganga at kahihintay na umusad ang mga sasakyan, ang lagkit pa ng pakiramdam mo dahil sa natuyong pawis sa katawan.

Kung aware kayo sa operasyon ng LRT 1, siguradong naramdaman ninyo ang pagbuti ng serbisyo nito kaya nga nakakuha ito ng ISO certification 9001:2015  at 14001:2015 sa loob ng dalawang taon simula nang pangasiwaan ito ng Light Rail Manila Corporation (LRMC) noong Setyembre 2015.

At dahil ito ang pinakaligtas na train line sa bansa, hindi nakapagtataka na pumalo sa mahigit 450,000 ang mga pasaherong sumasakay sa LRT 1 araw-araw.

Sabi nga ng mga pasahero, in good hands sila sa serbisyo ng LRT 1. Para po sa kaalaman ng ating mga kababayan, nag-effort nang sobra ang LRMC dahil kaligtasan at buhay ng mga pasahero ang nakasalalay sa kanilang operasyon.

Sa loob ng nakalipas na apat na taon, gumastos ang LRMC nang mahigit sa P1 bilyon para ayusin ang structural defects ng tren para masiguro na magiging matatag at ligtas ito sa panahon ng kalamidad tulad ng lindol o malakas na bagyo.

Pinalitan din ang parapets ng tren para maiwasan ang panganib dulot ng pagbagsak ng mga bitak ng semento. Umaabot sa P465 milyon ang ginugol ng LRMC para mapalitan ang 26km na riles sa kahabaan ng LRT 1.

Ang resulta: nagbunga ito nang mas banayad at higit na mabilis na biyahe para sa lahat. Tiniyak talaga ng pamunuan ng LRMC na hindi sasablay ang operasyon ng LRT 1 kaya nga gumastos pa sila ng P650 milyon para sa rehabilitasyon ng electrical sub-stations at ng mga luma at sirang bagon.

May ibang bagon pa nga na akala mo ay nasa loob ka ng isang library dahil sa disenyong mga libro na akala mo ay nakahilera sa book shelves.

Bukod dito, inayos din ang mga breaks ng tren pati na rin ang mga pintuan at aircon­ditioning system nito kaya naman hindi ka mag-aamoy-araw kahit gabi na at pauwi na kayo sa inyong mga tahanan.

Akala ba ninyo ay nakatuon lang ang LRMC sa pagpapabuti ng kondisyon ng tren? Aba e kinompleto po ng LRMC ang rekado sa pagsasaayos sa operasyon ng LRT 1 at pati ang kanilang mga empleyado ay isinailalim sa pangkalahatang safety training course para ma-institutionalize ang safety policies and procedures sa pang-araw-araw na gawain sa traffic management, station operations, at train operations.

Kwidaw din diyan ang mga magtatangka ng masama dahil tiyak na mahahagip kayo sa karagdagang 560 CCTVs na naka-install sa mga estasyon at depot sa Baclaran.

O; di ba, mas malawak ang natatanaw ng mga security personnel sa mga pasilidad kaya maglubay diyan ang masasamang-loob na gumawa ng hindi maganda sa mga pasahero.

Salamat din sa epektibong pamamahala ng LRMC dahil sinikap talaga nilang madagdagdan ang bilang ng mga bumibiyaheng light rail vehicles (LRVs) o mga bagon.

Mula sa unang 77 bagon noong 2015, umaabot na ngayon sa 116 ang tumatakbong bagon sa LRT 1 kaya naman umiksi ang pila pagsakay ng tren at ang oras sa paghihintay ng mga pasahero.

Ang bilang ng minuto sa pagitan ng mga paparating na tren ay bumaba mula sa mahigit limang minuto hanggang sa kasalukuyang 3.5 minuto na lang.

Maaasahang schedule at mas maraming biyahe sa isang araw, saan pa ba tayo?

Pinahaba ang oras ng operasyon ng LRT 1 mula 4:30 am hanggang 10:15 pm sa buong weekdays kaya naman hindi ka kakabahan sa pag-uwi dahil mabilis ka rin namang makaka­rating sa bahay.

Plano pa pong ipatupad ng LRMC ang iba pang pagbabago tulad ng paglalagay ng wi-fi sa mga estasyon at pagpapabilis ng takbo ng tren mula 40 kph patungong 60 kph.

Kaganda hindi po ba? Kung wala kang load para makapag-text sa mga mahal ninyo sa buhay, to the rescue ang wi-fi sa tren para magawa ninyo ito.

Ang LRT 1 po ay tumatakbo mula Roosevelt station sa Quezon City hanggang Baclaran Station sa Pasay at dumaraan din sa mga lungsod ng Caloocan at Maynila.

Problema sa trapiko? Sagot po ‘yan ng LRT 1 kaya nga para sa isang tipikal na pasahero, hayahay ang buhay kung sa LRT 1 ka sasakay.

Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected] Para sa mga nakaraang isyu ng BULABUGIN please visit https://www.hatawtabloid.com

BULABUGIN
ni Jerry Yap

About Jerry Yap

Columnist at HATAW D'yaryo ng Bayan / CHRONICLE (Customs); National Press Club of the Philippines President (2010-2012), Treasurer (2012), Director (2004-2010) and National Chairman at ALAM (Alab ng Mamamahayag)

Leave a Reply

Your email address will not be published. Required fields are marked *

*

Scroll To Top