Friday , February 21 2020
Breaking News
You are here: Home / News / Ulo nasugatan, mukha nagasgas… Babae nahulog sa riles ng LRT1
Ulo nasugatan, mukha nagasgas… Babae nahulog sa riles ng LRT1

Ulo nasugatan, mukha nagasgas… Babae nahulog sa riles ng LRT1

ISANG pasaherong babae ang sugatan nang mahulog sa riles ng Light Rail Transit (LRT) Line 1 makaraang mahilo sa Doroteo Jose Station sa Sta, Cruz, Maynila kaha­pon ng umaga.

Dahil sa pangyayari, pansamantalang itinigil ang operasyon ng LRT Line 1 upang mabigyan ng tulong  ang babaeng pasa­hero na  hindi pina­ngalanan, edad 32 anyos.

Sa report ni Jacqueline Gorospe, Corporate Com­munication head ng Light Rail Manila Corporation, nangyari ang insidente  sa riles ng Doroteo Jose Station northbound lane na sinasabing nahilo ang babae habang naghihintay ng train dakong 6:45 am.

Sinabi ni Gorospe, agad isinugod sa Jose Reyes Memorial Medical Center ang biktima na nagkagalos sa mukha at patuloy na inoobser­bahan.

Nagulat ang mga security guard nang mahu­log sa riles ang nasa­bing babae agad nilang natulungan at isinugod sa pagamutan.

Muling nagpaalala ang pamunuan ng LRMC sa mga pasahero ng LRT na kung makaramdam ng pagkahilo ay agad ipagbigay-alam sa kani­lang mga guwardiya at mga kasabay na pasahero para agad matulungan.

Humingi ng pau­manhin ang pamunuan ng LRT-1 sa mga naabalang pasahero sa pagkaantala ng biyahe ng kanilang mga tren.

Dakong 8:00 am nang maibalik ang operasyon ng LRT-1.

Samantala dakong 2:00 pm ay naglabas ng pahayag ang pamunuan ng LRMC kaugnay sa insidente ng pagkahulog ng naturang babae.

Sa paglilinaw ng LRMC, inilipat sa Medical Center Manila ang babae upang mabigyan ng full medical examination at sumailalim ito sa X-ray ultrasound at CT scan.

Sa initial medical findings, ang biktima ay may head lacerations at gasgas sa mukha dahil sa pangyayari.

Sa kasalukuyan, patuloy na nagsasgawa ng imbestigasyon ang mga awtoridad hinggil sa insidente.

Pinuri ng LRMC ang train operator na may presence of mind o naging alisto kaya agad nag-emergency break.

Sa kabila ng insidente, tiniyak ng LRMC ang ligtas at maayos na serbisyo sa mga pasahero, sabay nananawagan sa mga sumasakay sa LRT-1 na sumunod sa rules and regulations sa mga estasyon at mga tren upang maiwasan ang hindi kanais-nais na insidente.

 

About hataw tabloid

Leave a Reply

Your email address will not be published. Required fields are marked *

*

Scroll To Top