Monday , January 20 2020
Breaking News
You are here: Home / Bulabugin / Mall parking na walang paki sa customers dapat kastigohin ng Kongreso
Mall parking na walang paki sa customers dapat kastigohin ng Kongreso

Mall parking na walang paki sa customers dapat kastigohin ng Kongreso

PANAHON na para ipadama ng mga mambabatas ang kanilang tunay na pagmamalasakit sa mamamayang Filipino.

Ngayong isa sa kanilang mga kapwa-mambabatas ang nabiktima ng bukas-kotse gang sa loob ng parking area ng isang kilalang mall sa bansa, panahon na para tanggalan nila ng ‘pangil’ ang mga aroganteng  may-ari ng mall.

Lahat ng mallgoers ay nakararanas ng kawalan ng pakialam ng security guards sa partikular at ng mall management sa kabuuan tuwing mabibiktima ng mga kriminal sa loob ng kanilang area of responsibility.

Hindi ba’t pagpasok pa lang sa parking ay makikita na natin ang malaking signage na walang pakialam ang security management ng mall kung ano man ang mangyari sa sasakyan na ipa-park sa kanila, masira, manakawan o makarnap man ito?!

At habang binabasa ito ng customer, inaabot naman ng kahera ang resibo para pagbayarin ka sa paggamit ng parking area nila.

Ang inyo pong lingkod ay biktima rin ng bukas-kotse gang. Nalingat lang at bumili ng maiinom ang driver ko, nadale na agad ang kotse ko.

Naniniwala tayo na ang bukas-kotse gang ay hindi isang ala-tsambang kriminal. Sindikato ito at maraming miyembro.

Malamang pagpasok pa lang sa mall ay may spotter na kung kaninong kotse ang bibiktimahin nila. Ganoon din naman sa mga outdoor parking space.

Kung ganito kalaki ang sindikatong ito, na tila hindi rin kayang sugpuin ng pulisya o ng ibang awtoridad, aba’y dapat nang gumawa ng batas ang mga kongresista at senador para protektahan ang mga kawawang biktima.

Palagay natin ay dapat obligahin ang mga mall na maglagay ng isang komprehensibong CCTV camera hindi lamang para sa recording ng mga pangyayari kundi sa aktuwal na monitoring sa mga naka-park na sasakyan sa loob ng kanilang bisinidad.

At pagmultahin, patawan ng kaukulang disiplina hanggang sa suspensiyon ng operasyon ng buong mall ang maging kaparusahan para maramdaman nila ang pagbabalewala nila sa kanilang customers.

Kung malalagay sa alanganin ang lisensiya ng kanilang operasyon, palagay natin ay magtatanda ang mall owners o iba pang establishments para pangalagaan nila ang kanilang customers.

Batas na may pangil lang po ang kailangan, mga kagalang-galang na mambabatas!

Puwede ba?!

Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected] Para sa mga nakaraang isyu ng BULABUGIN please visit https://www.hatawtabloid.com

BULABUGIN
ni Jerry Yap

About Jerry Yap

Columnist at HATAW D'yaryo ng Bayan / CHRONICLE (Customs); National Press Club of the Philippines President (2010-2012), Treasurer (2012), Director (2004-2010) and National Chairman at ALAM (Alab ng Mamamahayag)

Leave a Reply

Your email address will not be published. Required fields are marked *

*

Scroll To Top