Monday , April 6 2020
Breaking News
You are here: Home / Opinion / Manny er money is too big from PH’s tubig
Manny er money is too big from PH’s tubig

Manny er money is too big from PH’s tubig

SA TINDI ng galit at pagkadesmaya ni Pangulong Rodrigo Duterte, talagang gusto niyang maglahong parang bula ang Manila Water ng mga Ayala at Maynilad ni Manuel V. Pangilinan bilang concessionaires ng Metropolitan and Waterworks and Sewerage System (MWSS) sa paghahatid ng tubig sa sambayanan.

Isa sa mga ikinabuwisit ng pangulo ang paniningil ng Manila Water ng P7.39 bilyon s autos ng Singaporean Court dahil nalugi umano ang concessionaire nang hindi pumayag ang gobyernong Filipino na magtaas ng singil sa tubig.

Wala naman tayong tutol at sa totoo lang natutuwa tayo sa pag­mamalasakit ni Pangulong Digong sa sambayanan.

Siyempre, tubig ‘yan, basic need ‘yan at isa sa pinaka-importanteng pangangailangan ng isang tao, bakit nga naman nila ‘hoholdapin’ ang gobyerno?!

Ang tubig na isinusuplay nila ay mula sa natural resources ng bansa, bakit naman nila masyadong ikino-commercialize?!

Wattafak!  

Pero ang ipinagtataka natin ngayon, kung sisibakin ng Pangulo ang dalawang concessionaires bakit naman Crime ‘este Prime Water pa ang naisipan niyang biyayaan ng konsesyon?!

Hindi kaya alam ng Presidente kung gaano kabulok ang sistema ng Prime Water at kung gaano kaprehuwisyong disbentaha ang mapapala ng sambayanan kung ang kompanyang pag-aari ng pamilya Villar ang magiging concessionaire ng MWSS para mag-supply ng tubig sa bawat sambahayang Pinoy?!

Sabi nga ng mga lungsod o munisipalidad na biktima ng Crime ‘este Prime water, kung dati rati ay tuloy-tuloy ang serbisyo ng tubig sa lugar nila, walang amoy, at malinis, nang dumating ang Prime Water lahat ng klase ng kunsumisyon sinapit nila.

Sumirit ang minimum pay, marumi ang tubig — mula kulay kapeng may gatas hanggang sa tubig na kulay pusali — higit sa lahat may amoy ang tubig na tila galing sa sinalang tubig mula sa septic tank.    

Alam kaya ng Pangulo ‘yan?!

Sana’y malaman ni Pangulong Digong kung anong serbisyo mayroon ang Prime Water para huwag niyang tuluyang ibigay sa mga Villar ang konsesyon sa tubig.

Kung ‘naholdap’ tayo ng Manila Water at Maynilad, itong Prime Water  higit pa sa pandarambong ang gagawin sa atin.

Aba, gusto na nating maniwala — Manny er money is too big from Philippine’s ‘TUBIG.’

Moderate your greed naman!

WE WON AS ONE
sa SEAG
Ang galing ng Pinoy!

KUMUSTA naman ang mga walang habas na pumupuna sa pagdaraos sa Filipinas ng SEA Games? Nakatulog na ba kayo sa pagbibilang ng pagbuhos ng gintong medalya ng Filipinas na pormalidad na lang ang hinihintay upang opisyal nang ideklara na overall champion ang koponan ng Filipinas. 

Kumusta naman ang mga ‘kalde-kaldero’ at ‘kikiam’ diyan? Aba’y dahil siguro sa walang habas na paghambalos ninyo sa organizers ng SEAG kaya ginanahan nang todo ang ating mga atletang Pinoy sa tulong ng kanilang mga coach para sungkitin ang 113 gintong medalya, noong umaga pa lamang ng day 9 ng kompetisyon.

Kapantay nito ang 112 gold medals na nasungkit ng Filipinas sa 2005 SEA Games na ginanap din sa bansa. 

At dahil sa determinasyon ng mga atletang Pinoy at pagsisikap ng Duterte administration, Philippine Southeast Asian Games Organizing Committee o PHISGOC sa pangunguna ni House Speaker Alan Cayetano at iba pang sports officials,  natupad ang pangarap ng sambayanang Filipino na makuha ang korona sa patapos na 30th Southeast Asian Games 9.

Hindi pa tayo titigil aa 112 gold medals dahil marami pang sports events na lalabanan ang ating mga manlalaro kasama ang boxing at iba pang sports events.

Aba’y asahan na natin ang patuloy na pama­mamayagpag at paghakot ng medalya ng ating koponan. Sila po ay inspirado at ganadong maglaro hindi lamang para sa sarili kundi para sa bansa. 

Sino ba naman ang ‘di gaganahan sa pagsabak sa laban kung makikita ng mga world class facilities na itinayo ng gobyerno para sa SEA Games.

Panawagan natin sa bashers at mga pumu­puna, bakit di ninyo isama sa pinapa­salamatan ngayon ang mga organizers ng SEA games maging ang volunteers na nag­sakripisyo para mairaos nang maayos ang palaro.

Bakit kapag bad news, ang bilis ninyong makasisi lalo kay Speaker Cayetano na isa sa mga dahilan kung bakit sa Filipinas ginawa ang palaro.

O ngayong good news na, ‘di ba pwedeng magsabi ng thank you Speaker Cayetano. Pasalamatan din ang Pangulo at ang lahat ng tumulong sa SEA Games. Ang BCDA  ang DPWH, at iba pang ahensiya ng gobyerno.

At dahil sa tagumpay ng SEA Games, ayan, sa Filipinas na gagawin partikular sa Aquatic Center sa New Clark City sa Tarlac, ang isang international swimming competition na lalahukan ng 50 bansa. Maging ang turismo ng Filipinas uusbong nang husto dahil dito.

Kaya tayo ay mag-celebrate at palakpakan ang mga ateletang Pinoy lalo ang mga nakapagtala ng record breaking moments sa 30th SEAG kabilang ang pagbasag ni Kristina Knott sa national record ni Lydia de Vega sa 200m women’s run na kanyang pinagreynahan sa loob ng 33 taon. 

Tinapos din ng PH men’s volleyball team ang paghahari ng Thailand sa SEAG volleyball event. Nakopo ng grupo ang gintong medalya na sunod-sunod na pinanalunan ng Thailand sa loob ng limang taon. Ang panalo ni surfer Roger Casugay ng gold medal matapos iligtas ang karibal na Indoneaian surfer sa peligro.

Palakpakan natin ang mga atletang Filipino at lahat ng nasa likod sa pagdaraos ng 30th SEA Games.

We WON as one!

Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected] Para sa mga nakaraang isyu ng BULABUGIN please visit https://www.hatawtabloid.com

BULABUGIN
ni Jerry Yap

About Jerry Yap

Columnist at HATAW D'yaryo ng Bayan / CHRONICLE (Customs); National Press Club of the Philippines President (2010-2012), Treasurer (2012), Director (2004-2010) and National Chairman at ALAM (Alab ng Mamamahayag)

Leave a Reply

Your email address will not be published. Required fields are marked *

*

Scroll To Top