Monday , December 9 2019
Breaking News
You are here: Home / Bulabugin / Ang ‘kaldero’ at ‘pa-epek’ ni Drilon
Ang ‘kaldero’ at ‘pa-epek’ ni Drilon

Ang ‘kaldero’ at ‘pa-epek’ ni Drilon

TAHASANG pinatutsadahan ni 1-Pacman party-list Rep. Mikee Romero si Senate Minority Leader Franklin Drilon na isa sa dapat sisihin sa pagkaantala ng preparasyon ng 30th SEA Games.

‘Di ba nga’t si Drilon ang tumapyas ng P2 bilyon sa pondong gagamitin sana sa SEA Games na umaabot sa P9.5-B noong tinatalakay sa senado ang 2019 National Budget. Nitong buwan ng Mayo naipalabas ang pondo para sa SEAG dahil naantala nang apat na buwan resulta ng iringan ng kongreso at senado tungkol sa pork issue.

Kung naipalabas sana noong Enero 2019 ang badyet, ang dami sanang nagawa ng organizers nang mas maaga gaya ng konstruksiyon sa SEAG venues, paghahanda sa pagkain at kung ano-ano pa. Kailangan din sumunod ng organizers sa mga bidding at procurement process ng DBM na naaayon sa batas.

At hindi pa siguro nakontento si Drilon dahil kamakailan lang, ang cauldron naman ng SEA Games sa New Clark City ang kanyang pinagdiskitahan. Kinuwestiyon niya ang P45 milyong ginugol sa estruktura na magsisilbing pailaw hanggang matapos ang sports event. Ang malala pa, tinawag niyang ‘kaldero’ ang huling obra ng national artist na si Mañosa. Hindi tuloy maubos maisip ng mga tao kung pinopolitika ni Drilon ang palaro dahil sa mga binibitawan niyang akusasyon ngayon pa namang nagsisimula nang pormal ang SEA Games. 

Baka hindi naisip ni Drilon na ang mga atleta ang nababalahura sa pinakawawalan niyang akusasyom dahil ang cauldron ay pangkabuuang simbolo ng tapang, gilas, puso at tatag ng atletang Filipino.

Imbes batikusin ang simbolismo ng kanilang susuuang kompetisyon, ‘di ba mas dapat na nagbigay ng tapik sa balikat si Drilon sa mga atletang Filipino?!

At dahil sa pagpapakawala niya ng mga akusasyon, ‘di ba nga’t na fake news at nakor­yente pa si Drilon ng akusahan niya si BCDA President Vince Dizon, manugang ni Mañosa ang nagdisenyo ng cauldron.

Ayun, karaka-rakang nag-sorry kay Dizon si Drilon.

Sabihin na nating may mga aberya sa pagkain, transportasyon at accommodation ng mga atleta na excuse me po, ay nararanasan din ng mga atletang Pinoy kapag sumasabak sila sa mga international competition sa ibang bansa, dadagdagan mo pa ba ang paghila pababa sa kapwa mo Pinoy?

Nakawawalang dignidad ang pagtawag na kaldero sa  cauldron. Nakakawalang gana. Nakapanghihina ng loob.

Kaya sana naman, magkaisa ang mga Filipino habang idinaraos ang palaro at tigilan muna ang mga puna at batikos. Huwag na tayong makisali sa mga ‘fake news’ bagkus ay magkaisa para sa ikatatagumpay ng SEA Games.

Laban, Filipinas!

Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected] Para sa mga nakaraang isyu ng BULABUGIN please visit https://www.hatawtabloid.com

BULABUGIN
ni Jerry Yap

About Jerry Yap

Columnist at HATAW D'yaryo ng Bayan / CHRONICLE (Customs); National Press Club of the Philippines President (2010-2012), Treasurer (2012), Director (2004-2010) and National Chairman at ALAM (Alab ng Mamamahayag)

Leave a Reply

Your email address will not be published. Required fields are marked *

*

Scroll To Top