Monday , December 9 2019
Breaking News
You are here: Home / News / Citizen’s arrest vs ‘mambababoy’ sa Jones Bridge
Citizen’s arrest vs ‘mambababoy’ sa Jones Bridge

Citizen’s arrest vs ‘mambababoy’ sa Jones Bridge

HINIKAYAT ni Manila Mayor Francisco “Isko Moreno” Domagoso ang citizen’s arrest laban sa mag­tatangkang ‘mana­laula’ sa pinagandang Jones Bridge na nag­dudugtong sa Intra­mu­ros at Ermita sa Binon­do, Maynila.

Pahayag ni Moreno, “Be vigilant. ‘Yung mga magdudumi dito, ares­tohin ninyo, taongbayan. Hindi lang amin ito. Bilang pamahalaan, sa ating lahat ito… bilang Filipino, bilang Manile­ño. You own it.”

Idinagdag ni Mayor Isko, “‘Wag ninyong haya­an ang isang ‘tolongges’ na babuyin ang mga bagay na pag-aari natin. May kaakibat na responsibilidad sa kalayaang ating tina­tanggap.”

Sinaksihan ng tina­ta­yang 7,000 katao ang pagpapailaw sa maka­saysayang tulay na nag-uugnay sa Intramuros at Ermita sa Chinatown at Escolta Avenue.

Kasama sa pasina­ya ni Mayor Isko sina Vice Mayor Honey Lacuna, ang mga opisyal ng lokal na pamahalaan ng Maynila sa pangunguna ni Secretary to the Mayor Bernie Ang.

Isa sa mga tampok na pangyayari rito ang pagbabalik ng estatwa ng La Madre Filipina sa bungad ng tulay na orihinal na pinagtayuan noong 1938.

Pinuri ni Isko, ang ginawa ni City Engineer Armand Andres, Depart­ment of Public Services chief Kenneth Amurao, at tourism chief Charlie Dungo, gayondin si   architect Jerry Acuzar, sa napakabilis na pagpa­paganda sa Jones Bridge na tinapos sa loob ng dalawang buwan.

Anang alkalde, na­ging pokus ng reha­bili­tasyon ang Jones bridge dahil ginugunita ang ika-100 taon sa ginampanang papel ng mga Kastila para mapagdugtong ang Chinese community sa Binondo, sa Intramuros, ang sentro ng pama­mahala noong panahon ng pananakop ng mga Espanyol.

“Sa mga kabataan na busy kapapanood ng YouTube, maganda rin mag-google kayo dahil ang hindi marunong lumingon sa nakaraan ay ‘di makararating sa paroroonan,” pang­hihikayat ni Mayor Isko.

Kaugnay nito, ang pagbabalik ng La Madre Filipina na nilikha ni Juan Arellano sa orihinal na kinalalagyan nito ay importante dahil ito ang naging piping saksi sa  Battle for Manila noong World War II.

Nabatid na may apat na eskulturang nakalagay sa magka­bilang dulo ng  pre-war Jones Bridge.  Ang isa ay nasira noong giyera, ang isa ay inilagay sa  Rizal Park at ang dalawa ay inilagay sa Court of Appeals Building sa Ermita, Maynila.

(BRIAN BILASANO)

About Brian Bilasano

Leave a Reply

Your email address will not be published. Required fields are marked *

*

Scroll To Top