Thursday , May 13 2021
Breaking News
You are here: Home / News / Preparasyon sa Undas pinangunahan ni Mayor Toby Tiangco
Preparasyon sa Undas pinangunahan ni Mayor Toby Tiangco

Preparasyon sa Undas pinangunahan ni Mayor Toby Tiangco

PINANGUNAHAN ni Mayor Toby Tiangco noong Lunes ang inspek­siyon sa NavoHimlayan public cemetery upang masigurong magiging ligtas at maayos ang pagdaraos ng Undas sa lungsod.

“Tuwing Undas, umaa­bot sa 10,000 ang duma­dalaw sa NavoHimlayan, at sa mga katabi nitong priba­dong sementeryo. Nais nating masiguro na magi­ging maayos ang lahat sa araw ng ating pag-aalala, walang sakuna, at ligtas ang lahat ng mga bibisita sa puntod ng mga yumao nilang mahal sa buhay,” aniya.

Nasa 700 pulis, bom­bero, kawani ng lungsod at barangay, health and emergency personnel, sweeper, at volunteer ang inatasang magbigay-serbisyo at mangalaga ng seguridad sa mga libingan sa lungsod sa 1 Nobyembre.

Nakipag-ugnayan din ang pamahalaang lung­sod sa Philippine Army, Metropolitan Manila Development Authority, at Philippine Red Cross para sa karagdagang mga magbabantay.

“Inaasahan natin na aabot sa 15,000 ang dada­law sa mga puntod nga­yong taon kaya nais nating maging handa para rito,” ani Tiangco.

Binigyan ng pamahalaang lungsod ng pagkakataon na maglinis ng mga puntod ang mga residente hanggang 5 pm ng 30 Oktubre.  Ang mga gamit na panglinis o pangpinta na maiiwan sa sementeryo matapos ang itinakdang oras at araw ay kokompiskahin.

Ipinahayag din ng lungsod ang pagsasara ng Gov. Pascual St. — mula A. Ignacio St., Brgy. Daanghari hanggang Los Martirez St., Brgy. San Jose — mula 31 Oktubre, 1:00 pm hanggang 2 Nobyembre, 12:01 am.

Muli rin ipinaalala sa mga residente at iba pang bibisita na ipinagbabawal ang pagdadala ng mga patalim o kahit na anong matutulis na bagay, baril, alak o iba pang nakalala­sing na inumin, gamit sa sugal, at loudspeaker o iba pang gamit na makalilikha ng malakas na ingay.

Hinimok din ang mga magulang na pagsuotin ng ID na mayroong pangalan, contact details, at address ang kanilang mga anak, bilang paghahanda kung sakali mang mahiwalay.

“Hinihiling din natin sa lahat ng mga bibisita sa mga sementeryo na sundin ang zero waste. Iwasan ninyo ang ires­ponsableng pagtatapon ng basura. Igalang natin ang huling himlayan ng ating mga mahal sa buhay at panatilihin natin itong malinis,” ani Tiangco. (JUN DAVID)

About Jun David

Leave a Reply

Your email address will not be published. Required fields are marked *

*

Scroll To Top