Joshua, pinagseselosan ni Markus

“WHAT you see is what you get. Alam n’yo namang wala akong sasabihin, confirm or deny it,” ito ang sagot ni Markus Patterson kung ano ang tunay na estado ng relasyon nila ngayon ni Janella Salvador, “we’re good friends,” sabi pa.

Kaya ang tanong namin ay kung ilang buwan o taon na silang ‘friends’ ni Janella at inamin ng aktor na, “mag-6 months na since ‘MMK’ (Maalaala Mo Kaya), kasi roon kami naging close.”

Sa madaling salita, anim na buwan na silang dating at exclusive ‘yun ha, so alam na kung ano ang ibig sabihin.

Sa panayam ng bida ng iWant digi-series na Kargo ay inamin niya sa Tonight with Boy Abunda na nagselos siya noong una kay Joshua Garcia na leading man ni Janella sa seryeng Killer Bride pero sa kalaunan ay hindi na nang ipaliwanag sa kanyang mabuti ng aktres.

Kaya ang sundot naming tanong ay kung in-assure siya ni Janella na hindi dapat pagselosan si Joshua at ang ganda ng ngiting isinagot sa amin ni Markus.

Samantala, kasalukuyang umeere na ang 5 episodes ng Kargo sa iWant handog ng Star Creatives mula sa direksiyon ni Julius Alfonso. Kasama rin sa cast sina Lui Villaruz, Gillian Vicencio, at Rio Locsin bilang si Lola Tere.

Ayon sa taga-iWant ay umabot na sila sa 13-M subscribers kaya naman mas lalong na-inspire ang bawat unit na gumawa ng digital series para matugunan ang kahilingan ng kanilang viewers.

FACT SHEET
ni Reggee Bonoan