Wednesday , November 13 2019
Breaking News
You are here: Home / Hataw Lifestyle / MMDA ginawaran ng Kahusayan sa Serbisyo Publiko ng KWF
MMDA ginawaran ng Kahusayan sa Serbisyo Publiko ng KWF

MMDA ginawaran ng Kahusayan sa Serbisyo Publiko ng KWF

BINIGYAN Paranagal ng Komisyon sa Wikang Filipino (KWF) ng Selyo ng Kahusayan sa Serbisyo Publiko ang Metropolitan Manila Development Authority (MMDA) para sa paggamit nito ng wikang Filipino sa pakikipag-ugnayan sa publiko para sa mga serbisyo, programa, at proyekto ng ahensya.

Ito ang kauna-una­hang pagkakataon na nakatanggap ng pagkilala ang MMDA mula sa KWF, ang regulating body ng wikang Filipino at ang opisyal na institusyon ng pamahalaan na naata­sang paunlarin at ipreser­ba ang iba’t ibang daya­lekto ng bansa.

Ayon kay MMDA Chairman Danilo Lim, ang Selyo ng Kahusayan sa Serbisyo Publiko – Antas 2 ay nagsisilbing inspirasyon ng ahensiya para tuloy-tuloy na ipatupad ang Executive Order 335 na naghihi­kayat sa mga opisina ng gobyerno na gumamit ng wikang Filipino sa mga opisyal na transaksiyon, komunikasyon at kores­pondensiya.

“Isang karangalan para sa amin na makilala ang aming mga inisyatibo sa paggamit ng wikang Filipino sa araw-araw na paninilbihan sa ating mga kababayan. Higit sa pag­sasalin sa Filipino ng mahahalagang doku­mento, mga karatula at iba pang mga pabatid, responsibilidad natin bilang mga Filipino ang pagtataguyod at pagsu­suporta sa paggamit ng ating sariling wika,” ani Lim, na ibinahagi ang parangal sa mga emple­yado ng ahensiya sa seremonya ng pagtataas ng watawat nitong Lunes.

Kinilala rin ng KWF ang MMDA sa paggamit ng wikang Filipino sa Facebook page ng ahensiya, infomercials, at road traffic signs.

Isinalin ng MMDA mula English sa Filipino ang ilang pangalan ng tanggapan, mga poster at brochure, pormularyo sa mga kliyente (process flow charts), misyon at bisyon, at Gabay ng Mamamayan (Citizen’s Charter).

“Makaaasa kayong kami ay patuloy ninyong magiging katuwang sa misyong paigtingin pa ang paggamit at pagpa­palaganap ng wikang Filipino, lalong lalo sa tuntunin ng serbisyo publiko. Tayo ay magka­isa at mag-ugnayan para mas mapaunlad at ma­pre­serba ang ating wika. Mabuhay ang Wikang Filipino!” dagdag ni Lim.

Ang seremonya ng pagpaparangal ay isinagawa ng KWF noong Agosto bilang bahagi na rin ng pagdiriwang ng “Buwan ng Wika.”

About hataw tabloid

Leave a Reply

Your email address will not be published. Required fields are marked *

*

Scroll To Top