HINDI itinanggi ni McCoy de Leon na mismong si Roxanne Barcelo ang inisip niya sa kanilang love scene sa pelikulang G! na tinatampukan din nina Mark Oblea, Paulo Angeles, at Jameson Blake.
Esplika ni McCoy, “Siya talaga ang inisip ko, kasi wala akong maisip, kasi parang hindi mo na kailangan mag-isip. Kasi, usually, hindi ba mga artista naman talaga ang i-imagine-in mo? Kasi napakagaling ni Ms. Roxanne, maganda at sexy.”
Mula sa direksiyon ni Dondon Santos, ang G! na handog ng Cineko Productions ay nag-iisang tropa movie sa 2019 Pista Ng Pelikulang Pilipino na mapapanood na sa mga sinehan sa Sept. 13. Ito’y ukol sa binatang si Sam (McCoy) na may cancer at kabilang sa bucket list niya bago mamatay ang maka-experience ng sex kasama ang mga kaibigang sina Dom (Jameson), Wacks (Mark) at Bry (Paulo). Si Roxanne ang gaganap na Sandy, na tutupad sa first sexual experience ni Sam.
Aminado ang actor na tinablan siya sa love scene nila ni Roxanne. “Tinablan po ako noong eksena, hahaha! Pero after naman ng eksena, ina-ate ko na nga si Ms. Roxanne, e. Kumbaga during ng eksena, parang tinitingnan ko siya, magagandahan ka talaga e, hindi na kailangan mag-effort pa para pagandahin siya sa isip ko. G na, G (game na game) na talaga po kami sa eksena, actually, nakalimutan ko na nga po kung nakailan kaming take. Kasi may pinagdaraanan din siya sa eksena at ako nga po may pinagdaraanan din, dahil may sakit ako sa movie. Kumbaga, bonus na lang po, pampakiliti na lang sa mga tao iyong mga sexy scene,” saad ni McCoy.
Pahabol niya, sa kabuuan ng pelikula ay mas kaabang-abang ang love scene nila ni Roxanne. “Sa trailer kasi parang kaunti lang. Lalo na kapag pinanood, dere-deretso siya, pa-intense nang pa-intense. May sexy, pero mas nangibabaw talaga rito ‘yung mga kalokohan at iyong pagkakaibigan sa istorya.”
Mapapanood na ang G! sa Sept. 13 bilang entry sa 3rd PPP kasabay ng pagdiriwang ng 100th anniversary ng Philippine Cinema. May premiere night ito sa Martes, Sept. 10 sa Cinema 5, SM North, Quezon City. Kasama rin sa movie sina Kira Balinger, Rosanna Roces, Jao Mapa, Gio Alvarez, Dominique Roque, Moi Bien, Alora Sasam, Nick Parker, Precious Lara Alcaraz, at Joey Marquez.
ALAM MO NA!
ni Nonie Nicasio