Saturday , August 15 2020
Breaking News
You are here: Home / Opinion / Nakaraang earthquake drill ng gobyerno para sa “The Big One” hindi epektibo
Nakaraang earthquake drill ng gobyerno para sa “The Big One” hindi epektibo

Nakaraang earthquake drill ng gobyerno para sa “The Big One” hindi epektibo

ANG earthquake drill na inilunsad ng ating gobyerno ng ilan ulit para sa tinaguriang “The Big One” ay tila hindi epektibo at wa-epek sa mismong oras ng lindol kagaya nang naganap kahapon sa Metro Manila at karatig na mga probinsiya partikular sa Pampanga at Zambales.

Ang mga dry-run o sinasabing practice ng mga earthquake drill ay naging matagumpay hanggang sa practice nga lang nguni’t palpak ito nang dumating mismo sa realidad at mismong kaganapan.

Ang lindol na naganap noong Lunes, 5:11 pm at naitalang magnitude 5.7 sa Maynila at 6.1 sa Zambales ang nagpatunay na hindi applicable ang mga inilunsad na earthquake drill partikular para sa “the big one.”

Kung pagmamasdan ang mga naging reak­siyon ng mga tao ay nagmistula itong mga manok na walang ulo na walang ginawa kundi magsi­gawan, mag-iyakan, mataranta na sa simpleng salita ay puno ng panic.

Naging matagumpay lang na ating naob­serbahan ay nang kumalma na ang lindol dahil nakita na natin na ang mga taong  nagbabaan at naglabasan sa matataas na gusali ay behave nang lahat sa labas ng lansangan at mga kalye. Maliban dito ay wala nang naisagawang mga precautionary measure kagaya ng mga tinuro nila sa earthquake drill.

Ang pinakamagandang nangyari ay nasa bakasyon na ang karamihan ng mga mag-aaaral at mga estudyante na nakabawas ng taranta at panic sa naganap na lindol.

Kung titingnan natin sa literal ay maaaring ito ay wake-up call ng Maykapal hinggil sa mga nagiging kaganapan sa ating bansa.

Malaki ang posibilidad na ipinapahiwatig niya sa sambayanang Filipino na tayo’y magbuklod-buklod na at magkaisa sa panunumbalik ng kapayapaan sa ating bansa.

May posibilidad rin na ito ay panawagan para sa lahat ng mga politiko at kakandidato sa nalalapit na mid-term election sa 13 Mayo na sila ay maging totoo sa kanilang magiging tungkulin sa bayan at mamamayan.

Pinaparamdam din siguro sa lahat ng mamamayan na huwag pagamit sa mga politiko at siguraduhing sila ay magiging isang matalinong constituent at hindi isang bobotante.

Nawa’y ipagdasal natin ang isa’t isa na manatiling ligtas at kalmado sa lahat ng mangyayari. Sana’y maging matapang, matatag at mapanatili ang nakaugalian nating bayanihan para sa kapwa nating Filipino sa buong kapuluan.

YANIG
ni Bong Ramos

About Bong Ramos

Leave a Reply

Your email address will not be published. Required fields are marked *

*

Scroll To Top