Saturday , October 20 2018
Breaking News
You are here: Home / Opinion / Pisong dagdag-pasahe hudyat na ng kalbaryo
Pisong dagdag-pasahe hudyat na ng kalbaryo

Pisong dagdag-pasahe hudyat na ng kalbaryo

SIMULA noong Biyernes, pinayagan na ng LTFRB ang mga tsuper ng jeep na maningil ng dagdag-piso, mula P8 tungo sa P9, para sa pasahe sa Metro Manila, Central Luzon at CALABARZON. Dangan nga raw kasi, hindi na mapigil ang pagtaas ng presyo ng mga produktong petrolyo tulad ng langis at diesel pati na rin ng spare parts ng mga sasakyan.

Para sa mga nakaaangat sa buhay, hindi mabigat na pasanin ang pisong dagdag sa pasahe. Pero para sa nakararaming Pinoy na isang kahig, isang tuka, dagdag ito sa kalbaryong pasan nila araw-araw.

Ang siste pa, simula pa lamang ito ng pag­hihirap na inaasahan ng ordinaryong mamamayan dahil sa pagpapatupad ng dagdag na buwis sa mga produktong petrolyo sa ilalim ng Tax Reform for Acceleration and Inclusion o TRAIN. Nakaamba na rin kasi ang mga petisyon para sa pagtataas ng pasahe sa bus at iba pang pampublikong sasakyan gayundin sa singil sa koryente.

READ MORE:  Gen. Querubin vs Duterte

Bago naisabatas ang TRAIN (Republic Act 10963), walang excise tax na ipinapataw sa diesel, LPG at kerosene. Dahil sa batas na ito, magkakaroon na ng buwis ang mga nasabing produkto at madaragdagan ito taon-taon. Mula P2.50 ngayong taon, lolobo sa P6.00 ang buwis na ipapataw sa diesel sa taong 2020.  Ang buwis sa LPG ay tataas nang piso taon-taon mula 2018 hanggang 2020. Maging ang gasolina na may P4.35 excise tax bago ang TRAIN, tataas din ang buwis mula P7.00 ngayong taon tungo sa P10.00 sa taong 2020.

Ayon sa BIR, nakakolekta na ang pamahalaan ng P4.73 bilyon galing sa excise tax sa produktong petrolyo sa loob lamang ng tatlong buwan simula nang ipatupad ang TRAIN noong Enero. Kapalit naman ng koleksiyong ito ang pagtaas ng presyo ng mga gasolina (P8.07 bawat litro), diesel (P8.95 bawat litro) at kerosene (P9.15 bawat litro) sa loob din ng nasabing tatlong buwan.

READ MORE:  Masusing imbestigasyon sa robbery-fire incident sa Parañaque

Maaaring malinis ang intensiyon ng mga mambabatas nang ipasa nila ang TRAIN. Layon daw kasi nila na makakuha ng sapat na pondo para palawakin pa ang mga proyekto ng gobyerno at pagbutihin pa ang serbisyo sa mamamayan.

Ang hindi natin maintindihan, bakit ang mahihirap ang nagpapasan ng bigat ng mga panibagong buwis? Hindi ba alam ng magigiting nating senador at kongresman na ipapasa lamang ng malalaking negosyante ang dagdag na buwis sa presyo ng kanilang mga produkto?

Sigurado namang alam nila na ang bulto ng mga petrolyong ibinebenta sa Filipinas ay ginagamit para sa transportasyon (pampasahero at pangkargamento), operasyon ng mga pagawaan at pagpapadaloy ng koryente. Lahat ito ay may direktang epekto sa presyo ng mga pangunahing bilihin gayundin sa presyo ng serbisyo.

READ MORE:  Imee: hero ko ang tatay ko!

Hindi kataka-taka na dahil sa mga buwis na dulot ng TRAIN, umabot ang inflation natin nitong Hunyo sa 5.2%. Huling naabot ang taas ng inflation na ito noong Oktubre 2011.

Ano ang epekto ng numerong ito? Kaakibat nito ang pagtaas ng presyo ng mga gastusin sa pabahay, tubig, koryente, gas at iba pang petrolyo (4.6%);  transportasyon (7.1%). komunikasyon (0.4%) at edukasyon (4.0%).

Nararamdaman ang dagok ng pagtaas ng bilihin partikular sa mga pagkain tulad ng bigas (4.7%); mais (14.1%); arina, tinapay at pasta (2.4%); karne (5.0%); gulay (8.6%) at iba pang klase ng pagkain (3.1%).

Lahat ng numerong ito ay galing sa gobyerno kung kaya’t hindi maaaring sabihin na guni-guni lamang o black propaganda galing sa oposisyon. Simple lamang ang sinasabi ng mga numerong ito. Maiksi na naman ang kumot. Matuto tayong mamaluktot.

PINGKIAN
ni Ruben Manahan III

COMMENTS

About Ruben III Manahan

Scroll To Top
 

Copyright hatawtabloid.com | All Rights Reserved