Sunday , September 23 2018
Breaking News
You are here: Home / News / Angara sa gobyerno: Seguridad ng uuwing OFWs mula Kuwait tiyakin
Angara sa gobyerno: Seguridad ng uuwing OFWs mula Kuwait tiyakin

Angara sa gobyerno: Seguridad ng uuwing OFWs mula Kuwait tiyakin

MULING nanawagan si Senador Sonny Angara sa gobyerno na kung  maaari ay gawing klaro ang mga plano sa mga pinauuwing Filipino workers mula sa Kuwait, dahil posibleng malagay sa alanganin ang kapakanan ng kanilang pamilya sa pagbabalik-bansa kung walang tiyak na mapapasukan.

“Walang ibang para­an para mahikayat natin sila na umuwi na rito kundi ang maliwanag na plano para sa isang reintegration program ng gobyerno. Dapat tiyak na may makukuha silang trabaho pagbalik dito. Bukod sa pagsisiguro sa kanilang kaligtasan, dapat ay may trabaho at tulong pangkabuhayan na naghihintay para sa kanila,” ani Angara, vice chairman ng Senate labor committee.

READ MORE:  NBI, PDEA muna sa illegal drugs ops

Si Angara rin ang sponsor ng Republic Act 10801 o ang batas na nagpapalakas sa kapangyarihan ng Overseas Workers Welfare Administration (OWWA), sa pagtulong at pagbibigay-ayuda sa mga OFW.

Sa ilalim ng bagong batas ng OWWA, tinatayang 10 porsiyento ng mga kontribusyon ng OFWs sa ahensiya o ang tinatawag na OWWA Fund, ang dapat gamitin taon-taon para sa reintegration program para matulungan ang mga OFW na mawawalan ng trabaho sa ibang bansa.

Sa naturang programa, may mga nakalaang trabaho at mga tulong pangkabuhayan na kinabibilangan ng livelihood training, access to credit, at grant money na magagamit nilang puhunan sa pagnenegosyo.

READ MORE:  Kadiwa ibalik (Para siguradong walang gutom) — Imee

Isasailalim din sila sa mga libreng financial literacy and techno-skills training, business counseling, at bibigyan ng job referrals.

Ngayong taon, sa kabuuang P2.876 bilyon budget ng OWWA, P376 milyon dito ang nakalaan para sa reintegration services.

Mababatid na kamakailan, dahil sa iba’t ibang kontrobersiya sa pagitan ng Kuwait at ng Filipinas na nag-ugat sa umano’y pang-aabuso sa Filipino domestic helpers doon, nagdesisyon si Pangulong Duterte na pauwiin sa Filipinas ang OFWs para rito magtrabaho.

READ MORE:  Goitia bagong PRRC director (Itinalaga ni Duterte)

“Ginawa nating core program ang OFW reintegration sa bagong OWWA Law dahil layunin nating hikayatin sila na bumalik ng bansa at dito mamuhay nang maginhawa at ligtas sa pang-aabuso kasama ang kanilang mga pamilya. Magagawa lamang natin ‘yan kung may malawak tayong plano sa kanilang magiging trabaho sa pagbabalik-bayan. Kung merong Build, Build, Build ang pamahalaan para sa mga impraestruktura, dapat may katapat itong Jobs, Jobs, Jobs para sa ating magbabalik-bansang OFWs,” saad ni Angara.

(CYNTHIA MARTIN)

COMMENTS

About Cynthia Martin

Scroll To Top
 

Copyright hatawtabloid.com | All Rights Reserved