HATAW! D'yaryo ng Bayan hatawtabloid.com
ISANG anak ng magsasaka at registered nurse ang humakot ng pinakamaraming parangal sa Philippine Military Academy (PMA) CLass 2018 Alab Tala o alagad ng lahing binigkis ng tapang at lakas.
Si Cadet 1CL Jaywardene Galilea Hontoria, 25-anyos ang topnotcher sa taong ito, isang registered nurse, anak ng magsasaka at tubong Balabag, Pavia, Iloilo. Pinili niyang mapabilang sa puwersa ng Philippine Navy.
Labing-isang parangal at pagkilala ang natanggap ni Hontoria mula kay Pangulong Rodrigo Duterte, pangunahin ang Presidential Saber.
Nasa ikalawang pinakamataas na puwesto si Cadet 1CL Ricardo Witawit Liwaden, 24, ng Gawana, Barlig, Mountain Province.
Limang parangal ang kanyang tinanggap, pangunahin ang Vice Presidential Saber.
Si Liwaden ay anak ng isang magsasaka at isang retired teacher, at gustong maging kasapi ng Philippine Army.
Ikatlong puwesto ang nakuha ni Cdt 1CL Junjay Malazzab Castro, 23-anyos, ng Amulung, Cagayan.
Tatanggap siya ng SND saber, anak ng magsasaka, at gustong maging miyembro ng Philippine Army.
Ika-apat na puwesto ay nakuha ng isang babae, si Cadet 1CL Leonore Andrea Carino Japitan, 21-anyos, ng Brgy. Ambago, Butuan City.
Tatanggap siya ng plake, isang driver ang kaniyang tatay, at kawani ng gobyerno ang nanay, gustong maging kasapi ng Philippine Army.
Ikalimang puwesto si Cdt 1CL Mark Jantzen Nono Dacillo, 25-anyos, ng Tumaga, Zamboanga City.
Isang guro ang kaniyang ina, gustong maging sundalo ng Philippine Army.
Ikalawang babaeng kasama sa top ten ng Alab Tala Class 2018 para sa ika-anim na puwesto si Cadet 1CL Jezaira Laquinon Buenaventura, 22-anyos, ng Bais City, Negros Oriental.
Tatanggap siya ng tatlong parangal, kapwa kawani ng gobyerno ang kaniyang ama at ina. Nais mapabilang sa mga sundalo ng Philippine Army.
Taga-San Clemente, Tarlac ang nasa ikapitong puwesto, si Cdt 1CL Jessie Antonio Laranang, 22-anyos. At gustong magpalipad ng eroplano o fighter jets ng Philippine Air Force.
Tatanggap siya ng Philippine Air Force saber, isang magsasaka ang ama.
Hometown graduate para sa ika-walong puwesto si Cdt 1CL Paolo Balla Briones, 20, ng Camp Allen, Baguio City.
Susunod siya sa yapak ng ama na isa ring sundalo, kasapi ng Philippine Army, bagaman siya ay gustong maging kasapi ng Philippine Air Force.
Habang Philippine Navy ang gustong samahan ng top 9 na si Cdt 1CL Jayson Raymundo Cimatu, 24-anyos, ng Casiguran, Aurora.
Retiradong sundalo ang ama at siya ang papalit sa pagiging sundalo sa pamilya.
Babae ang nakakuha ng pang sampung puwesto, si Cadet 1CL Micah Quiambao, Reynaldo, 22-anyos, ng Bamban, Tarlac.
Isang guro ang ina at isang self employed ang ama, gustong maging miyembro ng Philipine Air Force.
Samantala, pinakabatang graduate para sa taong ito sa edad na bente anyos, sa susunod na linggo, 21 Marso 2018 ay si Ma. Angelika Escano Fernandez, habang ang pinaka-nakatatanda sa edad na 27 ay si Eugene Ivan Divinagracia Tayona.
(ROSE NOVENARIO)
VALEDICTORIAN
BINIGYAN
NG HOUSE & LOT
SA kauna-unahang pagkakataon sa kasaysayan ng Philippine Military Academy (PMA) commencement exercises, tumanggap ng house and lot ang valedictorian ng PMA.
Sa ginawang “presentation of graduates” na tinatawag isa-isa ang mga nagsipagtapos, nagulat at napa-Wow ang lahat nang tawagin ang valedictorian na si Cadet 1CL Jaywardene Hontoria.
Pagkatapos ianunsiyo ang mga parangal na matatanggap niya, inihayag ng emcee na tatanggap din siya ng house and lot sa Camella Savanna sa Iloilo City.
Hindi magkamayaw sa pagpalakpak ang lahat habang halos mapaiyak sa tuwa ang kaniyang mga magulang.
(ROSE NOVENARIO)
