Friday , September 21 2018
Breaking News
You are here: Home / News / Valenzuela may tulong pinansiyal sa drug rehab graduate
Valenzuela may tulong pinansiyal sa drug rehab graduate

Valenzuela may tulong pinansiyal sa drug rehab graduate

MAY tulong pinansiyal na halagang P10,000 ang pamahalaang lungsod ng Valenzuela sa mga dating nagumon sa ilegal na droga at ngayon ay magtatapos sa kanilang rehabilitation program sa Magalang, Pampanga, para sa kanilang panimula.

Ayon kay Mayor Rex Gatchalian, ang tulong pinansiyal ay upang makapag-umpisa ng panibagong buhay ang mga magsisipagtapos sa anim-buwan programang kanilang nilahukan makaraan sumuko sa ilalim ng “Oplan Tokhang.”

“Maliit na puhunan, ngunit malaking tulong na rin kung kanilang pagsusumikapang magbagong buhay, at magkaroon ng tuloy-tuloy na pakikipaglaban sa ilegal na droga,” ayon kay Gatchalian.

Hangad din ng alkalde na maibalik sa lipunan nang maayos at maging kapaki-pakinabang ang mga naging biktima ng droga.

Idaraan ang pagbibigay ng tulong pinansiyal sa pinakamahuhusay na kooperatiba sa lungsod na titiyak na magagamit nang tama ng mga benepisyado ang naturang salapi.

Kabilang sa mga kooperatiba ang San Isidro Labrador Parish Multi-Purpose Cooperative, Valenzuela Development Cooperative at Holy Cross Savings and Credit Cooperative.

Ang pagbibigay ng pera ay bahagi ng 18-buwan “after care program” ng pamahalaan at ng Valenzuela City Council Resolution No. 959 o ang “Drug Rehabilitation Graduates Productivity Program.”

Sa pamamagitan ng pagmimiyembro sa Tokhang surenderees, maaari silang makapag-loan sa mga kooperatiba nang mas malaking halaga.

Magsisilbing membership fee nila ang P5,000 sa ibinigay ng lokal na pamahalaan at ang natitirang P5,000 ay garantiya kung sakaling hindi makapagbayad sa tamang oras ang mga dating drug patient sa kanilang inutang na pera.

Ang naunang mga nabigyan ng tulong pinansiyal ay mga nakatapos sa drug rehabilitation program na muling nagpa-drug test at nagnegatibo sa ilegal na droga.

Hinihintay ng pamahalaang lungsod ang nasa higit 80 pang dating pasyente na hindi pa sumasailalim sa panibagong drug test upang mabatid kung hindi na bumalik sa kanilang mga dating bisyo.

Inatasan ng alkalde ang kanilang Public Employment Services Office (PESO) na tulungang mabigyan ng trabaho ang mga dating pasyente na mas piniling magkaroon ng trabaho kaysa livelihood packages. (JUN DAVID/ROMMEL SALES)

 

COMMENTS

About JUN DAVID / ROMMEL SALES

Scroll To Top
 

Copyright hatawtabloid.com | All Rights Reserved