Tuesday , November 13 2018
Breaking News
You are here: Home / Opinion / Kapalpakan
Kapalpakan

Kapalpakan

MALIWANAG na nagkaroon ng malawakang kapalpakan kaya nakalusot ang Islamic State of Iraq and Syria (ISIS) na sumusuporta sa Maute group sa ginawang pananakop sa Marawi City.

Unahin natin sa panig ng gobyerno. Hindi maikakaila na nagkaroon ng kapabayaan sa pagkuha ng impormasyon kaugnay ng seguridad ng mga mamamayan at kapaligiran kaya hindi man lamang nila natunugan na kumikilos na ang ISIS at Maute.

Kapuna-puna na kahit nagtagal ang bakbakan sa pagitan ng puwersa ng gobyerno at ng mga terorista na pumasok na sa ikalimang linggo ay hindi nauubusan ng armas ang mga militante.

Ibig sabihin nito ay nakapaghanda nang husto ang ISIS at Maute bago pa naganap ang labanan. Nakapuwesto na sila sa mga barangay na papasok at palabas ng lungsod kaya madali nila itong naokupahan.

READ MORE:  Mga pokpok pabalik-balik lang sa nightclub

Hangarin nila na kontrolin ang lungsod at magsagawa ng kabi-kabilang mga pambibihag upang maipakita sa mundo kung ano ang magagawa ng ISIS sa Filipinas. Kaya agad ikinalat at itinanim ng Maute group ang mga bandila nila na kulay itim sa lungsod.

Nakapag-imbak din sila ng matataas na kalibre ng baril, bala, bomba at pati mga magagamit sa pagbuo ng booby trap laban sa mga militar sa mga kuweba at kabahayan sa tulong ng mga kaanak, kaibigan at kasabwat.

Paano ito nakalusot kung totoong mahigpit na nakabantay ang puwersa ng gobyerno? Wala silang kaalam-alam na nag-iipon na pala ng armas ang kanilang mga kalaban.

READ MORE:  Conjugal racket ng mag-asawang Corres sa Angeles pumutok na!

Pero ang kapalpakang ito ay hindi masisisi o masasabing pananagutan lamang ng ating militar. Dapat may pagkakaisa ang mga lalawigan, lungsod, munisipyo at pati na mga barangay upang maging masinsinan ang laban sa terorismo.

Responsibilidad ng mga sibilyan, komunidad, militar at pati na ng pulisya na magbahagi ng kanilang nalalaman sakaling may panganib sa seguridad.

Pero dahil nakalusot at naitago ang mga armas ng mga terorista ay maliwanag na pinabayaan ito ng ibang mga residente kahit nasaksihan nila ang nagaganap na pag-iimbak. Hindi rin maitatanggi na maraming residente na tagasuporta o nakikiisa sa mga terorista.

READ MORE:  Apol in, Bato out

Hindi ba’t nang magsalita si President Duterte sa harap ng mga nagsilikas na residente ng Marawi na napunta sa Iligan City ay hindi niya napigilan ang maglabas ng sama ng loob?

Kinuwestiyon niya kung bakit nila pinahintulutang makapasok ang ideolohiya na walang ginawa kundi patayin ang mga kapwa nila Muslim sa Gitnang Silangan at sa iba’t ibang lugar.

Kung nais nating labanan ang terorismo, sa halip magkanya-kanya ay magkaroon ng pagkakaisa upang hindi sila makapaghasik ng lagim sa ating kapaligiran.

***

SHORT BURSTS. Para sa mga komento o reaksiyon, mag-email sa [email protected] o mag-tweet sa @Side_View.

FIRING LINE – Robert B. Roque, Jr.

COMMENTS

About Robert B. Roque, Jr.

Scroll To Top
 

Copyright hatawtabloid.com | All Rights Reserved