Saturday , November 17 2018
Breaking News
You are here: Home / Opinion / ‘Ginatasan’
‘Ginatasan’

‘Ginatasan’

SA kabila ng daan-daang milyong piso na ibinubuhos ng gobyerno sa Philippine Dairy Program, bukod pa sa tulong na natatanggap mula sa pamahalaan ng Amerika at New Zealand, ay hindi umano ito umaasenso.

Nang umupo si Manny Piñol bilang kalihim ng Department of Agriculture and Fisheries matapos magwagi si President Duterte ay noon niya natuklasan ang umiiral na katiwalian sa mga programa rito.

Kagulat-gulat sa mga programa ang isang transaksiyon na nabuo sa nakalipas na administrasyon na agad pinatigil at ipinakansela ni Piñol.

Ito ay kaugnay ng pagbili ng mga kambing mula US na umabot sa mahigit P160 milyon, na ang isang kambing ay nagkakahalaga nang tumataginting na P170,000.

READ MORE:  De Lima, inamin na nag-text sa anak ni Dayan

Dahil sa eskandolosong presyo ay naitanong tuloy ni Piñol kung ang binibili ng gobyerno ay mga kambing na may ginintuang sungay.

Bukod dito, ang kalidad ng mga inaangkat na kambing para mapagbuti umano ang likas na pagbibigay ng gatas ng mga lokal na kambing ay mahina. Sa katunayan, marami sa kanila ay ginagamit lang daw para magatasan at hindi para makapagbigay ng magandang lahi.

Hindi rin malinaw ang programa sa pagkuha ng mga baka mula abroad.

Ang huling pag-angkat ng hindi bababa sa 300 Holstein dairy cattle ay napunta lang sa kamay ng isang pribadong rantsero at hindi sa mga magsasaka, dahil nabigo ang gobyerno na kilalanin ang mga tatanggap nito bago inangkat ang mga baka.

READ MORE:  Pangulong Digong may mabuting intensiyon pero kapos sa pondo

Aalisin ni Piñol sa programa ang “goat merchants” na bumibili lang ng kambing kung saan-saan at isinu-supply ito sa kagawaran.

Idineklara rin ni Piñol na aangkatin lang ng gobyerno ang pinakamahuhusay na materyales na pampalahi para sa pagpapabuti ng programa, kahit na siya pa mismo ang pumili ng mga aangkatin.

Tanging mga kambing at baka na may genetic records at rehistrado sa iginagalang na dairy associations ang kanilang bibilhin.

May malawak na kaalaman si Piñol sa naturang paksa dahil dati siyang nagpapalaki ng pinakamahuhusay na kambing sa bansa. Ang isa rito ay nanalo ng National Best Boer noong early 2000. Marami sa mga lahi na kanyang pinalaki ang nasa kamay na ng dairy goat breeders sa bansa.

READ MORE:  Drug money babaha sa Pasay (Kap Borbie Part 3)

Hindi man aktibo ay miyembro siya ng American Dairy Goat Association (ADGA), isa sa pinakamalaki at iginagalang na asosasyon ng goat farmers sa mundo.

Personal nating kaibigan si Piñol kaya batid natin na tutuparin niya ang pangako sa Pangulo na gagawin ang lahat para mawala ang korupsiyon sa kagawaran sa ilalim ng kanyang pamumuno.

***

SHORT BURSTS. Para sa mga komento o reaksiyon, mag-email sa [email protected] o mag-tweet sa @Side_View.

FIRING LINE – Robert B. Roque, Jr.

COMMENTS

About Robert B. Roque, Jr.

Scroll To Top
 

Copyright hatawtabloid.com | All Rights Reserved