Oportunista at manggagantsong barkers/solicitors sa NAIA terminals pinalayas na ni GM Ed Monreal

ISA itong magandang balita sa lahat ng pasahero sa mga terminal ng Ninoy Aquino International Airport (NAIA).

Dahil sa rami na ng reklamo, na kinabibilangan ng masamang karanasan ng isang buntis at ng pinsan niya na siningil nang P300 kada kilometro at kinuha pa ang iPhone5, naubos ang pasensiya at pag-asa ni Manila International Airport Authority (MIAA) general manager Ed Monreal na masusuheto pa niya ang mga transport barkers o solicitors sa NAIA.

Siyempre, alam naman ni GM Monreal na kailangan nila ng hanapbuhay pero mukhang ayaw ng mga barker at solicitors nang malinis na kita.

Ang gusto nila ay easy money.

‘Yun bang tipong isang pasahero lang, solve na ang isang linggong tosgas nila, may goodtime pa at may bago pang gadgets.

Grabe namang pagka-oportunista niyan.

Mas mabuti ngang i-ban na lang ang mga barker at solicitors. Ang ultimong layunin naman rito ni GM Monreal ay kaligtasan ng mga pasahero lalo na ‘yung overseas Filipino workers (OFWs) na madalas nabibiktima.

Nambibiktima rin sila ng mga foreign tourist pero mas mdalas ‘yung mga bagito lang. Kapag mga foreigner na sanay na at pabalik-balik na sa bansa, hindi na nila kayang lokohin ‘yun.

Saka marami na ring hotel ang naglalaan ng shuttle para sa kanilang mga patrons and clients.

Kaya mas madalas na biktima nitong mga barker at solicitors ‘e ‘yung mga turista, kababayan pa nating OFWs o kaya ‘yung mga kaanak nila.

Sa matitinong, barker at solicitor, wala tayong magagawa, kinakailangang mapatino ang sistema sa NAIA para rin sa ikagaganda ng imahen ng ating bansa.

Dapat ay dinisiplina rin ninyo ang inyong sariling hanay nang sa gayon ay hindi kayo naapektohan.

Kay GM Monreal, ngayon pa lang ay natutuwa na ang mga pasahero sa NAIA.

Mabuhay ka GM Ed Monreal.

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com

BULABUGIN
ni Jerry Yap