Friday , November 16 2018
Breaking News
You are here: Home / Bulabugin / When life is at stake we should act as one!
When life is at stake we should act as one!

When life is at stake we should act as one!

MARAMI ang nanghihinayang sa kaso ng overseas Filipino worker (OFW) na si Jakatia Pawa, na binitay kamakalawa sa Kuwait.

Nanghihinayang dahil nagkulang sa paalala at pakikipag-ugnayan ang mga kinauukulang ahensiya ng pamahalaan sa pamilya ng OFW.

Kung hindi na nga naman mare-reverse pa ang desisyon ng gobyerno ng Kuwait sa pagbitay kay Jakatia, sana man lamang ay nakatulong ang mga pangunahing ahensiya ng pamahalaan para maihanda ang pamilya Pawa.

O kaya ay nakapunta man lamang ang pamilya para makita sa huling sandali si Jakatia.

Pero ang nangyari, nabulaga ang buong sambayanang Filipino dahil mula  nang masentensiyahan noong 2007 si Jakatia, wala na tayong narinig na balita kung ano na ang status sa nasabing kaso.

Hanggang noong isang araw nga, pumutok na lang ang balita na binitay na ang kaawa-awang OFW.

Sabi nga ni OFW rights advocate Susan “Toots” Ople, “Kung alam na ng embassy kahapon, bakit wala man lang from the regional office ng DFA, kahapon din pinuntahan sana ‘yung pamilya, inihanda ‘yung kalooban.”

Si Jakatia ay akusado sa kasong pagpaslang sa 22-anyos na anak ng kanyang amo.

Ngunit sa proseso umano ng paglilitis ay walang nailabas na malakas na ebidensiya laban sa kanya.

Kaya nga sabi ni Madam Toots, “Hindi isang kriminal kung ‘di hardworking na OFW. Ganito dapat alalahanin si Jakatia Pawa na binitay sa Kuwait dahil sa kasong pagpatay umano sa anak ng kaniyang amo noong 2007.”

Sa pamamagitan ng Blas F. Ople Policy Center, nais ni Toots bilang hepe nito na, patuloy na kilalanin si Pawa sa kaniyang tapang, matibay na paniniwala at pagiging inosente.

Naniniwala ang inyong lingkod sa pagsusuri ni Madam Toots na inosente ang Pinay OFW dahil wala ni isa mang ebidensiyang mag-uugnay kay Pawa sa krimen. Isang halimbawa rito, hindi DNA ni Pawa ang natagpuan sa deadly weapon na ginamit sa krimen.

Sa kasalukuyan, wala na tayong magagawa kundi ang makiramay sa naiwang pamilya ng OFW.

Sa rekord, mayroon pang 80 OFWs ang nakahanay sa death row.

Ano na kaya ang nangyayari o status ng 80 OFWs nila sa kasalukuyan?

Hindi kaya nararapat na magkaroon ng daily bulletin ang Overseas Workers Welfare Administration (OWWA), at ang Office of the Undersecretary for Migrant Workers Affairs (OUMWA) sa kalagayan ng mga OFW na nasa death row?!

Sana sa susunod ‘e huwag puro papogi ang mga ahensiyang ito kapag patay na ang isang kababayan natin. Aksiyon hindi nganga sa kanilang kalagayan.

At sana lang, magkaroon nang pagkakaisa ang lahat: “When life is at stake we should act as one.”

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected] Para sa mga nakaraang isyu ng BULABUGIN please visit http://www.hatawtabloid.com

BULABUGIN
ni Jerry Yap
COMMENTS
READ MORE:  e-Gates sisimulan na sa mga paliparan

About Jerry Yap

Columnist at HATAW D'yaryo ng Bayan / CHRONICLE (Customs); National Press Club of the Philippines President (2010-2012), Treasurer (2012), Director (2004-2010) and National Chairman at ALAM (Alab ng Mamamahayag)
Scroll To Top
 

Copyright hatawtabloid.com | All Rights Reserved