Hero’s welcome kay Pacman

INIHAHANDA na ang Malacañang sa mainit na pagsalubong kay boxing champion Manny “Pacman” Pacquiao makaraan ang panalo sa laban kay Jessie Vargas.

Sinabi ni Communications Sec. Martin Andanar, pinanood din nila ang laban ng Filipino ring icon at mukhang si George Foreman ang boksingero na pinaliit dahil sa kanyang galing sa loob ng ring.

Ayon kay Andanar, maging ang meeting nila nina Sec. Jun Evasco, Presidential Spokesman Ernesto Abella, National Intelligence Coordinating Agency director at mga miyembro ng Kilusang Pagbabago kamakalawa, ay iniatras pagkatapos ng laban ni Pacquiao para mapanood ito nang buo.

Kaya maging ang Malacañang ay ayaw pa magretiro si Pacquaio at nais pang makapanood nang marami pang laban.

Umaasa silang makakalaban pa uli ni Pacquiao si Floyd Mayweather bago tuluyang tumigil sa pagboboksing.

“Oo, siguro ang gusto natin ay si Mayweather ang makalaban. Pero para mas mahaba pa ang… eh maganda rin si Crawford bago si Mayweather para mas marami pa tayong mapanood na boksing. Baka after kay Mayweather ay mag-retire na eh,” ani Andanar.