MAY nakuha nang impormasyon ang mga awtoridad mula sa tatlong nahuling suspek sa naganap na pagpapasabog sa night market sa Davao City noong Setyembre 2 na ikinamatay ng 15 katao at ikinasugat ng 69 iba pa.
Dahil dito, kampante si Philippine Army Chief Lt. Gen. Eduardo Año, susunod na nilang mahuhuli ang 10 iba pang mga terorista na kasamahan ng tatlong suspek sa insidente.
Ayon kay Año, nakausap na nila ang tatlong suspek na pawang mga miyembro ng Maute terrorist group na sina TJ Macabalang, Wendel Facturan at Musali Mustapha at positibo sila na sa susunod na mga araw ay matutunton na nila ang kinaroroonan ng kasamahan ng mga terorista.
Naaresto ng Philippine Army at ng pulisya ang tatlong suspek nitong Oktubre 4 sa Cotabato City sa isinagawang checkpoint operation.
Samantala, ipinoproseso na ang mga dokumento para maibigay ang pabuyang P3 milyon para sa kanilang tipster.
Ang nasabing reward ay inilaan ni Davao City Mayor Sara Inday Duterte Carpio at ng mga negosyante.