PATAY ang isang lalaki makaraan matupok ng apoy ang 30 bahay sa naganap na sunog nitong Sabado ng gabi sa Bayanan, Muntinlupa City.
Ayon sa ulat, hindi nakalabas sa nasusunog niyang bahay sa Block 10 ang biktimang si Gilyer Cinco dahil namamaga ang kanyang mga paa, ayon kay City Fire Marshall Supt. Gilbert Dulot.
Sumiklab ang sunog mula sa bahay ng biktima nang matabig niya ang isang gasera, dakong 10 pm.
Nasa 50 pamilya ang naapektohan ng sunog na umabot sa ika-limang alarma bago naapula pasado hatinggabi.
Patuloy pang inaalam ng mga awtoridad ang halaga ng napinsala ng sunog.