Kita sa PAGCOR ilalaan sa health, education sector

ANG health at education sector ang makikinabang nang malaki sa malilikom na kita ng Philippine Amusement and Gaming Corporation (Pagcor).

Ito ang inihayag ni President-elect Rodrigo Duterte sa mga dumalo sa kanyang thanksgiving party sa Davao City kamakalawa ng gabi.

Ayon sa incoming president, gagamiting pambili ng mga gamot at karagdagang kagamitan sa ospital at mga paaralan ang perang malilikom mula sa Pagcor.

“I will commit all earnings sa Pagcor which runs to billions. Ibigay sa mga ospital, para sa hospitalization,” saad ni Duterte.

Ipinangako rin ng outgoing Davao City Mayor na magpapatayo siya ng national high schools sa mga barangay na may 25 hanggang 30 estudyante.

Ayon kay Duterte, hindi na kailangang maglakad ng 20 hanggang 30 kilometro ang mga mag-aaral para lamang makapasok sa paaralan dahil siya na mismo ang magpapatayo ng National High School.

Matatandaan, bukod sa mga classroom, kulang din ang mga eskwelahan sa bansa lalo sa malalayong lugar.