HUWAG palampasin ang pag-uumpisa ng bagong yugto sa buhay ni Maricel (Melai Cantiveros) sa pagluwal niya sa kanyang anak sa Kapamilya primetime serye na We Will Survive.
Bagamat wala sa kanilang tabi ang ama ng bata na si Pocholo (Carlo Aquino), sasalubungin naman ito ni Maricel na kasama ang best friend na si Wilma (Pokwang).
At sabay naman sa panganganak ni Maricel ay ang tuloy-tuloy na pagkakalapit ng loob nina Wilma at Edwin ngayon ngang magiging magkapitbahay ang dalawa at mas magkakaroon pa ng pagkakataong magkakilanlan at magkausap.
Samantala, mas kakikiligan naman ng mga manonood sina Jenny (Maris Racal) at Ralph (McCoy De Leon) sa pag-amin ng huli para sa kanyang tunay na nararamdaman para sa dalaga. Inaabangan na rin ito online lalo na ng fans ng kanilang tambalan na kung tawagin ay McRis.
Paano mababago ng pagdating ng anak ni Maricel ang buhay nila? Ano kaya ang mga pagsubok na kanilang haharapin sa pagpapalaki sa sanggol? Dumating na kaya ang takdang panahon sa pagkikita nina Maricel at Pocholo?
Marami pang dapat abangan kaya tutukan ang teleseryeng nagpapakita na gaano man kapangit ang mundo, gaganda ang buhay basta’t magkasama tayo, ang We Will Survive tuwing gabi, bago mag-TV Patrol sa ABS-CBN o sa ABS-CBN HD (Sky Cable ch 167)
( ROLDAN CASTRO )