Convoy ng vice mayor pinasabugan, 3 patay (5 pa sugatan)

ZAMBOANGA CITY – Tatlo ang patay habang habang lima ang sugatan sa pagsabog ng bomba sa may Brgy. Sunrise, Isabela City, Basilan pasado 1 p.m. kahapon malapit mismo sa bahay ni Isabela City Mayor Cherrylyn Santos-Akbar.

Batay sa report ng mga awtoridad, sumabog ang bomba habang dumadaan ang  convoy  ni Incumbent Isabela City Vice Mayor Abdulbaki Ajibon.

Nabatid na agad binawian ng buhay ang tatlong lalaki kabilang ang dalawang tauhan ni Vice Mayor Ajibon na nasa front seat ng sasakyan.

Habang ang isa pang lalaking nasugatan na dumaan lamang sa lugar, ay kinilalang si Gregorio Heneral Delgado.

Hinala ng awtoridad, posibleng inilagay ang bomba sa nakaparadang tricycle sa lugar.

Ginagamot na sa ospital ang limang mga sugatan sa pagsabog.

Inaalam din kung ligtas sa pagsabog si Vice Mayor Ajibon na kasamang nakasakay sa convoy kahapon nang sumabog ang bomba.