HATAW! D'yaryo ng Bayan hatawtabloid.com
SHOWBIZ TIDBITS – James Ty III .
NAGSIMULA nang umere ang bagong noontime show ng TV5, ang Happy Truck ng Bayan noong June 14 na muling magkasama ang magkumpareng Janno Gibbs at Ogie Alcasid.
Sa isang event ng TV5 ay nakita namin mismo ang bagong stage ng show na isang trak na dinadala ng estasyon sa iba’t ibang lugar kaya kakaiba ito sa ASAP 20 ng ABS-CBN at Sunday All-Stars ng GMA na dating show nina Janno at Ogie.
Maganda ang konsepto ng Happy Truck pero magastos ito dahil sa labas ng studio ginagawa at taped ito ‘di tulad sa mga kalabang show na live sa studio.
Malaking papel din para sa bagong show ng TV5 ang pagsali ng mga teen star ng estasyon tulad nina Ritz Azul at Jasmine Curtis-Smith na inaasahang isasabak sa mga dance number sa show.
Noong isang laro ng PBA ay nakita namin si Ritz na nakasuot ng shorts kaya may karapatan ang TV5 na itapat siya kina Maja Salvador at Kim Chiu ng ASAP at Iya Villania at Sam Pinto ng SAS.
Hasa naman si Jasmine sa pagsasayaw dahil sa kanyang pagiging host ng streetdance show na Move It sa TV5 din.
